ORANJESTAD (AAN)- Mary Joan Foundation ta invita comunidad di Aruba pa reserva e fecha riba calender, dia 7 di December 2019 pa uni den un caminata, Be Your Own Light! Be Your Own Light (sea bo mesun lus), ta un tema cu ta brinda cada un di nos den comunidad di Aruba un momento di reflexion.
E malestar di cancer na pecho tin un impacto enorme den hopi persona nan bida. E ta trece den cierto aspecto hopi scuridad den nan bida.
E scuridad di miedo, di insiguridad, di trayecto di tratamento y hopi mas. Ta dificil cu den e momento di schock, rabia of tristeza, pa mira e lus.
E lus no solamente mester wordo busca cu bista, pero tambe mester wordo activa den nos mes. E lus di FE, e lus di SPERANSA, e lus di AMOR PROPIO, e lus pa DUNA FORSA pa sigui cu e bataya nos dilanti.
Be Your Own Light lo tuma luga diasabra dia 7 di December 2019. E lo cuminsa pa 7’or di anochi na Plaza Nicky Habibe. Por busca carchi na a Cede di Mary Joan Foundation, na Sabana Blanco # 8 na Dakota.
Ruta lo ta: Salida Plaza Nicky Habibe-Caya G.F. Betico Croes-bira man drechi direccion Adriaan Lacle Blvd straight te na cruzada-bira man drechi drenta L.G. Smith Blvd te na Royal Plaza- bira man drechi drenta Schelpstraat bai straight drenta Caya grandi y termina na Plaza Nicky Habibe.
Na banda di e esencia di e tema; tambe kier refleha riba e fin di un aña. Ban cana hunto pa bay dilanti y laga tur cos pisa y negativo tras di lomba. Ban cana pa mustra otro cu nos t’ey pa otro no solamente awe pero pa mañan tambe.
Na famianan, amistadnan, pashentnan, boluntarionan, instancianan, un y tur, ban bini hunto. Pa esnan cu pa un of otro motibo no lo por cana, bin pa brinda e calor di apoyo na otro.
Lo por conta cu lo tin entretenemento riba Plaza Nicky Habibe. Na tur cu ta enfrenta e scuridadnan di turbulencia den nan bida. Ban activa e lus interno. Be Your Own Light!
