Un instrumento importante pa cual DIARIO a boga ta realidad
*Gobierno, Comercio y Universidad ta uni den un esfuerso
*Porta a wordo habri pa negoshinan enfrenta avance tecnologia
ORANJESTAD(AAN)–Na diferente ocasion DIARIO a boga pa den intentonan pa economia crece y asina bira mas productivo pa Aruba, yega na capacitacion di empresarionan local cu ta e base di economia di Aruba. Siman pasa a cera cu e noticia sumamente importante cu Gobierno Wever-Croes, Camara di Comercio y Universidad di Aruba a yega na un acuerdo pa capacitacion y crecemento di empresanan local cu asina mester sostene economia local.
Aruba a bira un “Isla di Incubinacion” tabata e gran mensahe cu pueblo di Aruba a ricibi siman pasa. E ta di importancia hopi grandi pa e pais por traha riba desaroyo di su economia.
Na hopi ocasion DIARIO a haci mencion di e problema grandi di hopi empresa local chikito pa por a desaroya nan mes di acuerdo cu avancenan tecnologico di e mundo moderno. E ta encera cursonan pero tambe conocemento di entre otro espacio adecua y forma moderno di amplia resultadonan di un negoshi.
Empresanan local mester a adapta nan mes na forma rapido na e cambionan cu mundo moderno a trece y esaki no solamente ta nifica cu mester di instrumento y ekipo nobo.
Empresarionan y nan personal mester por wordo capacita pa traha den e mundo cu a conoce cambionan grandi y hasta metodonan moderno cu ta parce sumamente complica.
E sistema di “Business Incubation” cu a mira luz den e acuerdo firma entre gobierno, universidad y comercio ta garantisa sosten y asistencia na e empresario local den crecemento y desaroyo necesario pa por enfrenta e actual situacion y futuro.
DIARIO na hopi ocasion a papia di e era digital cu no solamente ta atende cu ekipo cu mester pero tambe ta exigi conocemento di terminologia, uzo di loke ta na alcance pa por crece den un mercado mundial cu exigencianan internacional.
E creacion di Aruba Business Incubation Agency ta basa riba e sistema Helix cu ta uni Gobierno, Comercio y Universidad den e esfuerso pa duna empresanan e sosten cu nan mester, manera e acuerdo cu a wordo logra ta exigi.
Tur persona cu ta parti di e agencia ta uni pa comparti actividad y conocemento tecnologico. Dor di cooperacion ta baha gasto cu cambionan den sistemanan conoci y introduccion di metodonan nobo y moderno ta contene.
DIARIO na hopi ocasion a mustra riba e gastonan grandi di capacitacion y adaptacion di gerencia y personal di empresa y e forma cu nan por economisa a base di cooperacion.
Gobierno ta aporta den financiamento di e proyecto a base di e plan internacional di Nacionnan Uni pa na aña 2030 mundo a conoce un desaroyo cu ta atende cu e problemanan social y asina ta lucha pa eliminacion di hamber y pobresa.
E gastonan cu e participacion di Gobierno ta nifica, ta directamente relata na e acuerdo cu gobierno tin pa medio di e meta di Nacionnan Uni den e Desaroyo Sostenibel di mundo y hende durante e añanan venidero.
Camara di Comercio ta e instancia semi-gubernamental cu ta encarga cu e bienestar di comercio como base economico di Aruba mientras cu Universidad di Aruba mester garantisa capacitacion a base di su caracter como instancia di enseñansa avansa.
DIARIO lo sigui informa Aruba riba e tereno aki cu ta sumamente importante y un paso economico di importancia enorme.
