Chofernan di Autobus di San Nicolas a fada di warda y kier contesta di minister preto ariba blanco

    257
    0
    SHARE
    - Advertisement -

    ORANJESTAD (AAN): Chofernan di e busnan di San Nicolas ta basta disgusta riba e desaroyonan cu ta pasando cu gobierno no ta dunando atencion na nan situacion.

    Nan no ta hayando cliente y pesey ayera nan a dicidi di protesta na Playa na stacion di autobus pa mustra nan malcontento na Gobierno y na DPT.

    Lisette Winklaar a duna di conoce cu nan tin basta luna ta sintando cu minister y te ainda nan no por haya contesta ariba diferente punto cu nan a trece dilanti.

    Un di nan ta nummerplaat. E pago di impuesto ta yegando y ainda nan no tin un contesta ariba esey. Nan ta pagando 960 florin, tin otronan ta paga 1840 y otronan 640 florin. Kiermen no tin un linea mescos pa nan tur, a splica.

    Biaha pasa cu nan a bay dilanti di parlamento, e mandatario encarga, Chris Romero, a pidi pa nan pone tur nan puntonan ariba papel. Nan a haci esey y a hiba e papelnan bek. A haya un reunion cu e minister y eynan a expone tur e puntonan cu e chofernan a manda p’e.

    E mandatario a pidi tempo pa e por a traha ariba dje. Varios biaha a sinta cu Minister Romero y tur e reunionnan a pidi atrobe pa e chofernan warda y dun’e tempo.

    For di Februari te cu aworaki, e chofernan no a haya ningun contesta ariba ningun punto.

    Otro preocupacion ta cu tin coleganan  cu ta drenta den nan ruta, a splica y pesey nan a dicidi di duna servicio te na e area di hotel. Ya caba tin hopi chofer di autobus na San Nicolas y a pidi atencion ariba esey.

    A pidi tambe un baño, a haci fiesta ariba esey y te awe no por haci uzo di e baño aki cual ta den Carnival Village.

    A puntra e dos mandatario encarga dicon no tin acceso na e bañonan y nan a bisa cu ta bay drecha esey y te awe nada a sosode, e chofernan di autobus a duna di conoce.

    Dos siman pasa, diabierna, nan tabata tin contacto cu Theo Kock di DTP y e a bisa cu ta bay traha ariba esey y cu ta bay haya un contesta diamars pero asina a sigui pospone y ainda ta ‘on hold’.

    E taxistanan ta di opinion cu nan no ta bay duna mas tempo y nan lo keda ariba nan accion, sigui core e ruta te ora cu actua contra esnan cu ta invandiendo nan ruta, cual ta yega te RIU Hotel.

    Sonia Vrolijk a laga sa cu antes Noord nunca a core ruta di hotel. Esnan di San Nicolas tabata baha cu cliente di Playa y hotel. Noord a bin daña e ruta haciendo ‘fast money’.

    E ruta San Nicolas – Playa tin 68 autobus y nan ta traha a base di un schedule, Vrolijk a bisa.

    Finalmente, e chofernan kier pa gobierno al menos duna nan un contesta preto ariba blanco mescos cu nan a haci.

    - Advertisement -

    DUNA COMENTARIO

    Please enter your comment!
    Please enter your name here