Randy Maduro:
ORANJESTAD (AAN): Vocero di Santa Rosa, Randy Maduro a duna di conoce cu dia 7 di December, Santa Rosa ta bay tin pa prome biaha un ‘Christmas Bazaar at South Side’ na San Nicolas.
El a indica cu esaki lo tuma lugar ariba Plaza Lolita. Ta bay transforma den un arena yena cu ambiente y henter Aruba ta mas cu bonbini y invita pa asina yega diasabra 7 di December cuminzando for di 6 pm te cu 11 pm.
E dia aki lo tin mas cu 25 tent unda lo bende cuminda crioyo, cos dushi, bebida, artesanianan productonan traha na Aruba. Tambe lo tin un ambiente musical den man di Nico O’connor cu su steelpan, Gaita Autentico y pa cera e anochi Claudius y su grupo Oreo.
Ta bay reconoce pa prome biaha 6 baluarte. E nombernan lo wordo anuncia despues. Nan ta personanan destaca como criador, piscado, cunukero, Randy Maduro a splica.
E dia aki e caminda dilanti Bevolking na San Nicolas ta bay ta cera. Pero e caminda banda di Arubus ta bay keda habri. E servicio di bus lo keda normal, Natalie Maduro, directora di Santa Rosa a manifesta.
