Por medio di Super Food Plaza Cares Program
ORANJESTAD (AAN): Luna di October tabata Breast Cancer Awareness month y pa e motibo ey Super Food Plaza Cares Program a haci un recaudacion di fondo pa Mary Joan Foundation.
Durante henter luna di oktober, clientenan di Super Food Plaza por a duna Afl. 1.75 of mas pa asina participa tambe pa gana un di e tres gift certificates cu ta worde rifa tur siman, patrocina pa Super Food.
Tanto Super Food Plaza como tambe Mary Joan Foundation ta masha gradici na e clientenan di Super Food Plaza pasobra a logra recauda e bunita suma di Afl. 48.155,95 pa e fundacion. Kier a gradici tambe Aruba Trading y Compra NV cu a sostene Mary Joan Foundation den e campaña aki dunando un porcion di nan venta di cierto producto na e fundacion.
E mision di Mary Joan Foundation ta pa duna servicio y sosten, ayudo y inspiracion na esnan cu ta afecta pa cancer di pecho. Nan ta yuda informa comunidad pa haci examinacion di pecho y di e programanan existente pa detecta e malesa trempan.
Cu e donacion aki, nan por sigui cu nan trabou valioso pa nos comunidad y focus tambe mas ariba esnan di un edad mas abou, como cu e edad di esnan cu ta sufri di cancer di pecho ta bahando.
Durante luna di November a toca turno na Club Kibrahacha 60+ pa recauda fondo p’e. E meta di Club Kibrahacha 60+ ta pa promove un estilo di bida independiente pa esnan di edad mas halto por medio di participacion activo den comunidad. Nan ta yuda esnan di 60+ keda activo atraves di actividadnan social, cultural, educacional y ehercicio.
Cu e suma recauda, Club Kibrahacha 60+ kier logra reintegra e personanan aki por medio di bishitanan regular y incorporacion den nan programanan existente.
E invitacion ta bay na un y tur pa pasa shop na Super Food Plaza durante luna di November y contribui tambe cu Club Kibrahacha 60+.
