Door di Proyecto SQULA
ORANJESTAD (AAN): Fundacion Hunga Teca dialuna mainta a haci entrega di e tabletnan cu a wordo dona door di Kiwanis Club of Palm Beach Aruba na e scol cu e fundacion a adopta e aña aki cu ta Colegio Santa Filomena na San Nicolas.
Yamila Hoevertsz-Kock, presidente di Fundacion Hunga Teca a gradici e directora di SKOA, Anuesca Baly cu a bay di acuerdo pa por a haci e proyecto aki posibel. Tambe a gradici Kiwanis Club of Palm Beach Aruba cu a haci e donacion di e tabletnan pa di e manera aki e muchanan por haya ‘remedial teaching’.
Nan ta haya programanan special cu e maestronan por uza pa e muchanan cu no ta compronde un materia bon of e muchanan cu ta asina lihe cu e maestronan por reta nan mente door di uza e apps cu tin den e tablet, Hoevertsz-Kock a indica.
E donacion a consisti di 17 tablet. Dos tablet pa klas. Tin e conviccion cu pa e proximo aña escolar lo por tin mas tablet pa mas mucha y asina e ta sigui crece, a expresa.
Ivan NG, Presidente di Kiwanis Club of Palm Beach a agrega cu Hunga Teca ta un stichting cu a caba di forma y nan a acerca e club di servicio pa e proyecto Squla. Despues di a haya sa mas di e proyecto, a dicidi cu esaki ta algo cu nan mester a duna un man.
Nan ta masha contento di por a sponsor e proyecto y segun NG nan lo sigui esaki di cerca pa wak e progreso y kico por haci mas den futuro.
Mario Nooijen, cabezante di Colegio Santa Filomena a expresa cu nan scol ta sinti bendiciona cu Hunga Teca a scoge pa traha hunto cu nan. Awor cu e donacion di Kiwanis Club ta algo leuk pa e muchanan. Ta trata di material educativo di 21 abilidad cientifico.
El a gradici Hunga Teca y el a gradici Kiwanis Club pa a yuda e scol.
