Home Editorial Cu celebracion di Thanksgiving nos ta gradici pa e fruta di nos...

Cu celebracion di Thanksgiving nos ta gradici pa e fruta di nos esfuerso

26
0
SHARE
- Advertisement -

Editorial 

Awe na Merca, famianan ta reuni pa celebra Thanksgiving. Un di e tradicionnan mas bunita di e pais ta uni hende cu ta yama danki pa e cosecha cu nan a ricibi

E contacto estrecho entre Aruba y Merca a haci cu tradicionnan Mericano a bira parti di nos custumbernan tambe. DIARIO awe kier expresa su gratitud pa un aña bendiciona cu nos y Aruba a conoce te awor.

Cu Thanksgiving oficialmente nos ta drenta e epoca di fin di aña, e festividadnan tradicional. Na hopi luga, awe ta cende e iluminacion di Pasco.

Ora nos expresa nos gratitud pa loke nos a ricibi na 2019, nos ta tene cuenta cu e elemento mas importante tras di Thanksgiving, cu a wordo introduci dor di pioneronan na Merca. Nan a bandona nan pais di origen y a bay establece nan mes na Merca.

Pilgrim Fathers manera e grupo a wordo yama, mester a cultiva un suela cu no tabata realmente fertil. Nan mester a percura pa ganado. Nan mester a lucha pa nan sobrevivi.

Ora e prome cosecha a bira realidad, nan a uni den oracion di gratitud. Nan a yama danki pa tur esfuerso, tur trabou y pa nan exito.

Hopi pais a tuma e tradicion aki, cu ta uni hende, famia y comunidad den creacion di un resumen positivo.

Awe nos tambe, den e luz di Thanksgiving, ta uni den e gratitud pa e resumen positivo cu 2019 a bira pa Aruba.

Na 2018 nos pais a yega un punto nobo. Nos tabata den un situacion manera e pioneronan Mericano, cu mester a planifica e comunidad cu nan mester a crea pa sobrevivi. Thanksgiving nan a yama danki cu nan a pone nan asuntonan na orden di tal forma, cu nan tabata tin cuminda, pero tambe vivienda. Nan a desaroya ekipo y instrumento nobo pa traha riba un comunidad nobo, cu a pasa den hopi problema.

Awe nos ta yama danki cu nos a logra pasa e momentonan mas critico cu Aruba a conoce, ora e futuro nobo di oro cu a priminti Aruba cu entrada di un refineria nobo, a spart for di otro.

Nos ta yama danki cu nos a sobrevivi e impacto di un caida economico total na 2018, ora e crecemento economico di 15 porciento priminti, a bira aumento di medidanan cu nos mester a tuma pa scapa nos pais.

Nos ta yama danki awe cu nos a logra mantene cabes riba awa cu un situacion financiero cu na 2018 tabata un caos. Awe nos ta celebra Thanksgiving cu un gobierno sinta na mesa tanto organisacion pa sigui soluciona problema.

Awe nos ta yama danki cu nos atrobe ta sinti cu nos tin un lider, cu ta duna guia y na nomber di nos Pueblo ta atende cu Reino y ta ricibi respet manera a keda demostra.

Ora e pioneronan na Merca a yama danki pa prome bes, ainda tabata tin un lucha grandi nan dilanti. Pero nan a logra cu e sodo di nan frenta, e trabou di nan mannan y nan fe den Dios.

Awe laga nos yama danki mientras nos ta drenta e epoca di fiesta cu lo hiba nos na 2020, cu lo bira e inicio nobo cu direccion fiho pa nos yega na solucion. Laga nos cuminsa yena nos futuro cu e luz di gratitud, alegria y union!

- Advertisement -

DUNA COMENTARIO

Please enter your comment!
Please enter your name here