Home General Cyber Attack y e ultimo atentado contra salud di Aruba

Cyber Attack y e ultimo atentado contra salud di Aruba

220
0
SHARE
- Advertisement -

Despues di holo di diesel y inundacion interior

Por papia di mala suerte cu e construccion di cinco strea cu yama HOH Aruba? No!  Loke ta indiscutibel ta, cu mester cuminsa discuti si e placanan cu a wordo uza pa traha un edificio di cinco strea, no por a wordo uza tambe pa un garantia di cinco strea cu e hospital ta cumpli cu su tarea.

Cyber Attack no ta nada nobo. Un par di siman pasa, Aruba a reuni pa atende e problema aki cu ta afecta tur comunidad na nos mundo cu ta depende di internet.

Tur doño di computer ta consciente di e peligernan di uzo di internet. Basta placa ta wordo gasta na proteccion di computer contra atake pero tambe na prevencion di perdida di tur informacion.

Pregunta ta awor, si realmente Aruba tabata tin expertonan cu merece nan placa for di momento cu a papia di hospital nobo na Aruba y a dicidi cu ta bay introduci e proyecto.

Discusion na prome luga mester ta awor, si por papia di responsabilidad den funcionamento di e hospital cu ta pio cu un pagara di problema.

Si analisa e prome exigencianan di cuido medico, mester duda serio den e forma cu e aspectonan mas importante di un hospital a wordo teni na consideracion ora a planea  e hospital nobo y a dicidi di gasta placa di pueblo.

E pregunta grandi ta, con e control di calidad di e hospital a tuma luga. Cu gobierno anterior a lubida di exigi un sala di operacion, nos por comprende si mira con a gasta placa di Aruba cu tur e proyectonan caro.

Pa nos ta remarcabel cu instancianan cu mester controla calidad di cuido medico na Aruba, no a para keto cu e boiler ta un peliger y cu holo di Diesel ta afecta salud di hende hasta den hospital.

Pa nos ta remarcabel cu e supervision tecnico di e hospital no a trece na claridad cu awasero por crea problema pa hospital si pa un periodo no mantene e forma cu ta deshaci di awa. Kico lo pasa si awasero cay y sigui cay dos siman tras di otro?

Awor ta Cyber Attack. Pa tin un atake cu ta afecta informacion di pashentnan, no por papia di prevencion di problema na HOH.

Mas bien mester grita cu “Hohoho, ta basta” pasobra informacion di pashent ta sagrado na un hospital. Esaki ta motibo pa tur hospital na mundo tuma medidanan serio riba e tereno aki.

Nos mester puntra awor kende por haci uzo di e red di comunicacion na cual e informacion di pashent ta conecta. Responsabilidad di hospital ta exigi pa proteccion di e informacion di pashent no ta alcansabel pa cualkier persona riba un network.

Responsabilidad di hospital ta exigi un sosten (un back up) pa na momento cu algo bay robes a pesar di tur medida, e informacion di pashent ta alcansabel.

Responsabilidad di hospital ta exigi defensa di mas halto di e informacionnan di pashent.

Na hopi ocasion nos a bisa cu hospital mester di asistencia profesional pa por funciona cu calidad. E momento a yega pa garantisa esaki riba tur tereno.

E informacionnan ricibi awe di hospital no ta suficiente den nos tempo moderno y exigencia di cuido di calidad na 2019!

 

 

- Advertisement -

DUNA COMENTARIO

Please enter your comment!
Please enter your name here