DIARIO ta analisa si tabata tin presion oficial riba
Lejuez Leynan di Aruba no conoce Facebook y no ta basa riba redashi
Den un situacion financiero y economico sumamente alarmante, Aruba a cay den un desaroyo politico fastioso na momento cu e miembro di Parlamento di MEP, Daphne Lejuez, a declara su mes independiente.
E motibo cu Lejuez a trece dilanti tabata presion pa el a vota na fabor di cambionan den e Leynan di Serlimar. Referencia a wordo haci na notificacionnan riba Facebook y insinuacionnan di conflicto di interes.
Ora nos papia di presion, nos mester papia di casonan concreto. Nos mester ta sumamente serio tambe ora nos ta señala algo cu ta contra nos ley, pues ta un delito.
DIARIO ta basa su mes solamente riba e definicion di presion y e grado caminda tin prueba cu interes di pueblo no a wordo sirbi y solamente interes politico a wordo teni na bista.
Pa haci e analisis nos mester bay manera semper na e base di nos leynan, cu no ta permiti pone presion riba un miembro di Parlamento pa e bay contra su concenshi.
Nos ta analisa e actitud pues di e dirigente di Parlamento y e forma cu e reunion a wordo hiba.
Cu na e momento aki nos no ta uza algo pa bay contra Lejuez, ta keda proba pa e hecho cu ora e reunion di Parlamento a tuma luga, nos a bisa e tempo cu Presidente di Parlamento mr. Ady Thijsen a cumpli cu su tarea ora el a pospone e reunion di Parlamento y no a forsa un decision di e miembronan cu no por a yega na un acuerdo.
Kico esaki ta encera den cuadro di nos leynan? Parlamento mester tuma decision a base di e consenshi di su miembronan. Esaki ta exigi pues cu e miembronan ta liber pa sigui nan consenshi ora nan ta tuma decision, vota, pa pasa un ley.
Ta un hecho castigabel si un miembro di Parlamento bay contra di e interes nacional pa sirbi otro interes.
Nos leynan no conoce Facebook. Nos leynan ta basa riba regla estricto cu na hopi ocasion nos a trece dilanti.
Durante ultimo dianan nos a mustra con e autoridad mas halto financiero di Aruba cu ta Algemene Rekenkamer Aruba, a bay contra e actitud di e mayoria di AVP den Parlamento pasobra nan no a ehecuta e control cu nan mester a mantene riba gobierno Eman.
Pa nos sostene cu tabata tin presion riba Lejuez, nos no por bay den Facebook cu ta un fuente di redashi cu ley di Aruba no conoce.
Nos ta bay atende cu e Reglamento di Orden di Parlamento y e forma cu e Presidente di Parlamento mester actua segun democracia.
Den tur e desaroyonan nos a sigui e actuacion di Presidente di Parlamento di Aruba, cu a dicidi pa Parlamento di Aruba.
E conclusion honesto segun nos leynan ta, cu ningun momento a exigi miembronan di Parlamento vota contra nan consenshi. Ora a bira evidente cu Lejuez no tabata di acuerdo, Presidente di Parlamento a duna Lejuez tempo pa bay dicidi.
Te awe e ley ta pendiente den Parlamento. For di momento cu rumornan di Facebook a start no a trata ley mas.
Presidente di Parlamento a tene su mes na regla y den Parlamento, e luga oficial caminda ta hunga politica contra ley of no, no tabata tin presion riba Lejuez.
