Jurgen Benschop di Fundacion Contra Cancer di Prostaat
ORANJESTAD (AAN): Jurgen Benschop, Presidente di Fundacion Contra Cancer di Prostaat (FCCP) a duna di conoce durante un rueda di prensa cu nan ta hopi contento di por sostene Wilhelmina Kanker Fonds cu e charla tocante cancer di pecho y di prostaat cu ta bay tuma lugar diasabra awor di 9 am te 11:30 am na Alhambra.
Desde September, e fundacion a cuminza cu un campaña pa concientiza comunidad riba kico ta prostaat, pero tambe con pa haci e testnan. E fundacion a realiza durante e aña cu e tema di cancer di prostaat ainda ta un tabu den comunidad, Benschop a remarca.
Como fundacion, nan rol principal ta concientiza comunidad riba e topico y tambe con por haci testnan pa check y keda check si tur cos ta na ordo, a agrega.
Despues cu e fundacion a inicia cu e campaña, nan a reuni cu e urologonan y tambe HAVA y nan a trece cierto preocupacionnan dilanti. HAVA tambe tin un rol hopi importante pa garantiza cu e pashentnan ta haya e informacion corecto.
E rol cu e fundacion ta fungi den esey ta pa concientiza comunidad cu nan por haci un test di sanger.
Desde cu e campaña a cuminza te cu awor a haya hopi bon ‘feedback’. Mas di 170 persona a bay haci test di prostaat na laboratorio y di cual mas di 140 a sali regular y mas di 30 cu a sali halto.
Esey ta duna indicacion cu casi 20% di esnan cu a bay haci un test di prostaat, nan test a sali halto, Benschop a indica.
Locual e fundacion kier a logra como meta a duna resultado y nan ta contento pa tende esey. E personanan aki awor mester sigui nan consulta cu nan docter di cas pa despues bay un urologo pa sigui haci testnan mas avanza.
Jurgen Benschop a laga sa cu e charla aki ta e ciere di nan campaña cu tabata tin durante e ultimo lunanan. November ta e luna di concientizacion riba malezanan di hende homber. Rond mundo tin e campaña unda hende homber ta laga crece un ‘mustache’ pa indica esey.
E charla aki ta cay net bon den e luna aki caminda ta concientiza comunidad. Fundacion Contra Cancer di Prostaat lo hunga un rol activo tambe den esaki cu ciere di e campaña, e presidente di FCCP a señala.
