Coordinador POH na WGK Jasmira Mora:
ORANJESTAD (AAN) — E diagnostico di Diabetes ta aumentando y e casonan ta birando mas serio, no na Aruba so pero na henter mundo.
Jasmira Mora Garces, Coordinador di POH (Praktijkondersteuner Huisartsenzorg) na Wit Gele Kruis, a comenta den entrevista cu DIARIO.
Jasmira a señala cu hopi biaha esaki tin di haber cu e cultura, e estilo di bida cu e personanan ta hiba. Por ehemplo, nan ta hopi druk, no ta come na tempo, ta cumpra cuminda riba caya; hopi mayor ambos ta traha y loke ta duna nan yiunan ta “fast food”.
El a referi na Diabetes tipo 2, cu ta esun cu tin mas influencia den e comunidad. Jasmira a splica cu no ta e malesa e hendenan (yiunan) ta hereda sino e estilo di bida, y akinan e mayoria di biaha e problema ta sinta.
Durante un lectura cu un docter Hulandes a duna organiza pa BENU, el a splica cu ta e falta di comemento saludable y falta di movecion, hopi biaha ta haci cu e persona ta yega na e malesa di sucu hopi mas lihe di locual e por a yega eventualmente.
Antes e malesa aki tabata conoci como malesa di hende grandi, pero awendia e no ta e caso mas. E ta gewoon Diabetes tipo 2.
E edad di Diabetes 2 a baha. E hoben ta aclarea cu POH no ta traha cu Diabetes tipo 1. E casonan aki ta wordo referi na docter di mucha, cu di nan banda ta referi e pacient pa un internista.
Pero si ta asina cu tin casonan di diabetes 2 cerca hende di apenas 20 aña y maneha esaki ta dificil, pa nan cambia nan estilo di bida. Mester di hopi guia, papia cu e pacientnan aki y purba di motiva nan.
Den e opleiding di POH nan ta haya “Entrevista motivacional” como un parti hopi esencial den nan estudio, pasobra mayoria di nan trabao ta consisti di motiva e persona, di purba cambia e persona su pensamento y lague wak kico ta loke ta importante y cu su hechonan tin hopi consecuencia riba e sucu.
POHnan ta duna e pacient hopi scogencia pero si nan ta haci esun robes pasobra e no ta bay drecha su situacion di diabetico asina aki.
Jasmira a duna di conoce cu nan ta tratando pa tur docter di cas tuma un POH den servicio. Mayoria di nan tin cobertura pero ainda falta siete docter di cas cu no tine.
Ademas el a bisa cu e POHnan ta drentando mas den publico tambe, pues no solamente riba e aspecto di nutricion pero tambe di movecion. Diadomingo siman pasa, un grupo di POH a participa activamente na e canamento cu Botica di Servicio a organiza y nan ta representa den cualkier evento of marathon di movecion pa pueblo sa cu nan no solamente ta papia, pero ta haci tambe.
Nan tin pensa pa bin cu un grupo di movecion di POH pa forma grupo di pacient riba diferente dia, pa asina pueblo por bin cana hunto cu nan.
Tambe nan ta duna charla den diferente centro di bario, por ehemplo pa personanan riba 50, 60 aña caba pasobra e ta concerni nan edad y cu kier haya mas informacion con nan mes por deal cu nan sucu, y purba baha nan dosis di remedi.
Parti di e trabao di POH ta yama e pacientnan pa corda nan riba nan cita, pasobra hopi biaha nan ta lubida.
