Analisis
Ayera oficialmente Aruba a cuminsa haci uzo di e caminda di aeropuerto pa hotelnan, cu a haya nomber di “ringweg” debi na e forma cu a dicidi di construi e caretera.
Aumento di actividadnan turistico a haci un conexion directo entre aeropuerto y e area di hotelnan necesario. Ningun hende por desmenti cu un conexion entre Ling & Sons y hotelnan tabata importante.
Na momento cu e proyecto di Mike y Benny a wordo presenta oficialmente algun aña pasa na Alhambra Ballroom, sinembargo ya Aruba a desaproba e forma cu mester a realisa e proyecto.
Aruba tabata tin tur motibo pa bay contra uzo di 440 Miyon, casi Mey Biyon, pa un solo caretera mientras tabata bisto cu Aruba tabata pasa den temponan sumamente dificil.
Gobierno Mike Eman a insisti riba nan proyecto di 18 rotonde y crusada cu mas ta salta na bista den wowo di Aruba.
Awe Aruba ta pasa den un tempo sumamente dificil. Pero awe Aruba mester paga pa e piñata politico di Mike Eman y Benny Sevinger, cu oficialmente ta wordo treci dilanti den e rapport di Algemene Rekenkamer Aruba cu a cuestiona e forma cu Mike y Benny a spart placa di Aruba, cu awe ta manca y destrosa riba tereno financiero.
Ayera gobierno actual a habri Watty Vos Boulevard. Watty Vos, un amigo di DIARIO cu semper tabata gosa di nos sosten, merece un caya of avenida na su nomber.
Watty Vos tabata un politico di pueblo for di momento cu como miembro di e prome directiva di MEP, el a bira conoci na Aruba.
Portanan di DIARIO a keda semper habri pa Watty Vos tempo e tabata parti di AVP.
Pues Watty Vos merece di wordo honra dor di Aruba y e pais tabata tin mester di un caretera di aeropuerto pa hotel.
E hecho cu un cas mester di un dak no ta nifica cu doño di e cas ta laga su famia den miseria pa e traha e dak. Un hende cu ta uza su sano huicio y no ta bay pone pan di nan famia na peliger, no ta bay traha un dak cu e diseño mas caro cu por tin.
Den caso di Watty Vos Boulevard, pa hunga politica, Mike y Benny a dicidi cu e “ringweg” ta bira un renchi cu e diamanta di mas caro na mundo.
Awe DIARIO mester aplaudi loke nan a haci? No!
Cu Gobierno actual a sigui cu e proyecto ta normal. No por a laga tur e caretera di rotonde na mita.
Cu awe Husticia, Ministerio Publico mester dicidi kico haci cu e forma cu Mike y Benny a abusa di fondo di Aruba, ta loke nos ta aplaudi.
Nos ta parti di e pueblo cu mester paga medida pa e forma cu Mike y Benny a abusa di nos placa cu entre otro e proyectonan di “Bo Aruba” cu a sink Aruba cu nan proyectonan di cinco strea cu realmente tabata nan piñata politico pa fiesta riba custia di Aruba.
