Home General E ora a yega pa e Arubiano haya prioridad

E ora a yega pa e Arubiano haya prioridad

1366
0
SHARE
- Advertisement -

Analisis

Aruba ta un isla chikito. Esaki ta encera cu e posibilidad pa expansion riba tur tereno ta limita. Na e momentonan aki sigur, tur esfuerso y tur trabou na e pais, mester ta dirigi riba e Arubiano.
Aruba a hiba un lucha fuerte pa su autonomia cu mester a duna e pais y cu ciudadanonan e siguridad di bienestar. E pakete total di autonomia ta directamente na e sentimento cu un persona tin cu e ta na su cas caminda e ta manda.

E palabranan aki por zona duro pero nan ta realidad di bida. Nan ta hasta e base di nos Constitucion cu ta exigi gobierno traha na interes di ciudadanonan y di e pais prome cu tur otro cos.

Aruba ta conoci pa su cordialidad y su balornan halto ora e ta atende cu tur cu mester di yudansa. Compasion y cordialidad ta marca di e Arubiano.

Sinembargo e calidad di bida, e posibilidad di bida di e Arubiano no por bay atras y e Arubiano no por bira victima di situacionnan den cual Aruba ta duna un man.

Mester bay duna prioridad na e Arubiano. Pa e ciudadano di Aruba haya prioridad, mester duna prioridad na e suela Arubano y e respet cu mester tin pa e pais.

Cada centimeter di e suela di Aruba ta sagrado pa e Arubiano y mester mira kico ta haci cu esaki. Luganan importante pa Aruba mester mantene nan nomber.

Por a mira con mas y mas nombernan di luganan na Aruba ta bay perdi pa bini cu nombernan nobo cu no ta bisa e Arubiano nada!

E suela di Aruba ta sagrado. Mester mira con ta haci cambionan na e pais cu no por perde su identidad pa proyectonan caro cu a deshaci di e imagen natural di Aruba.

E cultura di Aruba ta sagrado. E naturalesa di Aruba ta sagrado pasobra e ta sosten pa e Arubiano y ta importante pa e Arubiano mantene contacto cu e laso mas intimo cu e tin cu su pais, cu ta e naturalesa.

Mester cuminsa respeta Aruba y e Arubiano atrobe. E Arubiano mester haya garantia di por biba trankil na su pais. No tin tratado mas importante cu e derecho basico di e Arubiano riba su suela, na su pais.

Nacionnan Uni no por impone ningun regla pa Aruba sigur no den e caso di Nicolas Maduro, cu nan mes ta sostene. Si Nacionnan Uni a actua contra Maduro y no a duna Maduro hasta posicion di importancia, awe Maduro lo no por tin boca grandi ainda.

Nos no ta rechasa ningun hende den dolor, pero nos mester pone e siguridad di e Arubiano y di Aruba dilanti y si tin organisacion internacional cu ta kere cu no mester ta asina, nan mester bin asumi responsabilidad pa loke kier pone riba lomba di Aruba.

Economia di Aruba mester wordo sirbi. Mescos cu pa paga belasting comerciantenan Arubano mester aporta na nan pais, mescos den nan derecho pa sobrevivi den un crisis mester scucha nan pa asina tin bienestar pa trahadonan Arubano na prome luga.

Mester mira kico ta haci cu placa di Aruba, cu mester por lanta para atrobe. Mester lucha pa e bienestar di e Arubiano na un luga cu ta Aruba y no pida pais di fantasia di cualkier persona of grupo.

E edicion di awe ta carga cu problemanan cu e Arubiano y Aruba ta enfrenta. Ban hunto soluciona nan pero segun e normanan Arubano, na e sistema Arubano y cu respet pa e suela sagrado pa e Arubianonan.

- Advertisement -

DUNA COMENTARIO

Please enter your comment!
Please enter your name here