Home Social Family First Aruba y Ministerio di Asunto Social y Labor a organiza...

Family First Aruba y Ministerio di Asunto Social y Labor a organiza un “Family Fun Day”

45
0
SHARE
- Advertisement -

ORANJESTAD (AAN): Diasabra ultimo varios famia a participa na e actividad di ‘Family Fun Day’ organisa pa Fundacion Family First den colaboracion cu Ministerio di Asunto Social y Labor.

Cu declaracion di Gobierno di Aruba como “Aña di Famia,” riba aña 2019, hunto cu e Fundacion Family First su vision ariba e tereno – “Famianan sano pa un Aruba prospero” – a duna un total di 15 famia e oportunidad pa pasa un dia gozoso di famia cu otro.

E actividad a cuminsa for di 8or di mainta te cu 7or di anochi cu un programa yen di actividad cu meta pa trece miembronan di famia mas cerca di otro, alinea vision y direccion, traha hunto den ekipo y simplemente goza di otro.

“Nos ta hopi contento con e dia a bay. Tabata tin un ambiente hopi ameno y por medio di nos ‘icebreaker’ famianan a cera un conexion mesora cu otro. Nos a prepara un programa di actividad y tarea unda miembronan di famia mester a interactua hopi cu otro. Cada famia mester a traha nan ‘mision y vision board’ hunto como un unidad – pariente y yiunan. Tambe nan mester a pone y compromete na metanan pa e proximo 5 – 10 aña. Sigientemente nan mester a crea esaki visualmente den un obra di man,” Sra. Annelies Schoop, Presidente di Fundacion Family First a comparti.

Miembronan di famia tambe a participa hunto den ekipo, entre otro na actividadnan manera, scavenger hunt, weganan den pisina y drama alrededor di kampvuur, percurando asina pa bunita conexion entre e miembronan.

Otro topiconan interesante cu a wordo trata tabata entre otro, e importancia di famia, e importancia di tin bon comunicacion entre su miembronan, como tambe e nesesidad principal di cada ser humano, cu ta e amor incondicional.

“Di parti Fundacion Family First, nos ta tuma nota cu eventonan recreativo di famia ta sumamente nesesario. E ta nesesario pa e hobennan, pero sigur tambe pa e parientenan mes. Saliendo for di e ambiente di cas, e ta pone nan pensa hunto y traha den ekipo pa gana y sobresali den e actividadnan como un unidad. Felicidad y alegria tabata notabel riba e caranan, e tabata “One Happy Family” y esaki ta haci nos hopi contento,” Sra. Jennie Lion Sjin Tjoe, Directora di Fundacion Family First a añadi.

“Nos ta gradici Minister di Asuntonan Social y Labor, Minister Glenbert Croes y ekipo di su ministerio – Rochi Geerman y Darlaine Erasmus – pa e sosten y colaboracion absoluto na e exitoso ‘Family Fun Day.’ Como tambe, DJ Alvin pa a percura pa un ambiente musical, supremo. Nos ta hopi contento cu e resultado.”

- Advertisement -

DUNA COMENTARIO

Please enter your comment!
Please enter your name here