Home Hudicial Fiscal a cuestiona con miembro di prensa a cumpra agente di Polis...

Fiscal a cuestiona con miembro di prensa a cumpra agente di Polis pa haya radio di Polis

339
0
SHARE
- Advertisement -

Abogado mr. Lejuez ta condena cu ta persigui prensa en bes di busca un solucion humanitario

ORANJESTAD (AAN) – Ayera mainta pa oranan largo a dedica na tratamento di e caso penal cu Ministerio Publico a cuminsa cu e rumannan R.T. y L.T., kendenan ta wordo sospecha cu a cumpra e agente di Polis, A.M., pa asina yega na radio di Polis pa scucha informacionnan.

Den e articulo aki, DIARIO ta publica e punto di bista y exigencia di Fiscal y e defensa di mr. Lejuez. Den un otro articulo ta publica con e investigacion a tuma lugar y e cantidad di radionan di Polis cu a haya.

USA RADIO DI POLIS SCONDI

Fiscal a bisa cu a cuminsa investiga pasobra tabata sospecha cu falta radionan di Polis cu cierto miembronan di prensa lo tin esakinan. Na opinion di Fiscal, un agente di Polis mester ta integro y no mester laga su mes wordo cumpra. Fiscal a bisa cu R.T. a reclama cu su so ta wordo persigui y e otronan no. Na opinion di Fiscal, esey no ta asina.

PROVOCA POLIS PA HAYA RADIO

Fiscal a mustra cu tabatin un investigacion caminda a constata cu a provoca Polis di wordo cumpra pa haya radio. Fiscal ta haya cu intencional a cumpra Polis, a malversa radio di Polis. Fiscal a remarca cu R.T. ta bisa cu ta su tarea pa informa pueblo y cu concurencia ta grandi y noticia di Polis ta hopi importante. Na opinion di Fiscal, e derecho pa noticia no ta absoluto.

El a bisa cu Ministerio Publico tin cu evalua kico por duna pueblo y kico no. Fiscal a bisa cu e ta compronde cu e por ta frustrante pa media pero mester tene cuenta interesnan. Entre otro e interes di investigacion, kico ta ocupa cun’e y kico ainda falta. Mester tene cuenta cu privacidad di no solamente di sospechoso sino tambe e victimanan.

NO TENE CUENTA CU PRIVACIDAD DI HENDE

Segun Fiscal, a constata cu cierto media no ta tene cuenta cu privacidad di sospechoso y victimanan. E ta haya cu prensa mester atene su mes na reglanan. E hecho cu ta usa radio di Polis pa trece informacionnan pa asina haya mas atencion den pueblo, no por.

NO TIN NADA DI HACI CU POLITICA

El a mustra tambe cu a constata cu tin medionan liga na partidonan politico y Ministerio Publico ta siego pa esaki. Cu esey Fiscal kier mustra cu no ta asina Ministerio Publico ta servicio e minister di Husticia. Ministerio Publico y Landsrecherche no ta haci esaki.

CUMPRA AGENTE DI POLIS PA HAYA RADIO

Fiscal a mustra cu a ofece placa na agente di Polis, M. pa haya radio di Polis. A haya 4 radio di Polis na cas di R.T. Por a scucha e rumannan T. ta papia di Zorro cu ta referi na radio di Polis y cu a haya A.M. cu por facilita esaki pa pago. Fiscal a mustra cu si compara e caso aki cu e caso anterior, den e caso anterior no por a prueba cu e agente di Polis tabata haya pago.

Den e caso aki si y esey ta haci e caso mas serio. Fiscal a mustra cu na November 2016 con L.T. a acerca A.M. y a convence pa haya placa pa e radio di Polis. For e combersacionnan di whatsapp di R.T. por compronde cu ta A.M. a facilita un radio di Polis pa pago y despues a tuma esaki bek y a facilita un otro. Por scucha e rumannan T. ta papia di paga A.M. y cu tin un palabracion di pago.

Fiscal ta haya cu R.T. y L.T. ta culpable di malversacion di e radio di Polis via A.M., kende sin autorizacion di su superior tabata facilita R.T. e radio pa pago. Fiscal a mustra cu por scucha di pagonan cu a tuma lugar y hasta A.M. ta menciona 1550 florin cu e lo duna R.T. bek. Na opinion di Fiscal, no por bisa cu pa e di dos radio di Polis, na Januari 2017, R.T. a provoca A.M. pa haci esey pa pago. A.M. a bisa R.T. cu e ta fiya su radio. Pesey Fiscal ta haya cu mester declara R.T. liber di e acusacion di a provoca malversacion di radio di Polis na Januari 2017.

Fiscal a señala cu e sistema Celo tabata hustamente pa evita cu e miembro di prensa tin e radio di Polis hunto cune y tabata haya informacion di Polis via su cellular cu e Celo tabata transmiti.

CASTIGO

Fiscal ta haya cu e rumannan T. a haci nan mes culpable di delitonan serio. Intencionalmente a provoca agente di Polis pa wordo cumpra pa radio. Intencionalmente a provoca malversacion di radionan di Polis. Intencionalmente tabata scucha radio di Polis via aparato den telecomunicacion. Fiscal ta haya cu ta puramente pa propio interes nan tabata haci’e y tabata viola privacidad di hendenan.

No opinion di Fiscal, ta hustamente pa violoacion di privacidad di hende a dicidi di bin cu un circuito sera pa Polis. E ta haya cu L.T. ta menos culpable cu R.T. Pa loke nan a haci por exigi castigo maximo di 4 luna di prison. Door di scarcedad di celnan na KIA, ta dificil pa bolbe laga hendenan cu a wordo laga liber bay sera atrobe. Pesey Fiscal a scoge pa e castigo di trabou pa comunidad. El a bisa cu el a tene cuenta cu e castigonan duna den caso Kinikini 1. Sinembargo, den e caso aki, Kinikini 2, a cumpra un agente di Polis cual no por a prueba den Kinikini 1.

Fiscal a exigi pa R.T. 186 dia di prison di cual 180 dia ta condicional cu 3 aña di prueba. Tambe el a exigi 240 ora di trabao pa comunidad y si R.T. no cumpli e lo mester bay 120 dia den prison.

Fiscal a exigi pa L.T., 180 ora di trabou pa comunidad y si e no cumpli cu esaki, 90 dia sera den prison.

ABOGADO

Mr. Lejuez a bisa Hues cu ta importante pa prensa informa pueblo di noticia di Polis. Antes por a scucha scanner pa sucha Polis. Sinembargo Polis a bin cu tabata prohibi usa scanner. Polis no tabata actua contra esaki. Den pasado otro Ministernan di Husticia tabata na altura pero te asina leu no a actua contra esaki.

Despues a bin cu circuito sera cu no por a scucha Polis. Esey a haci cu cierto miembro di prensa a keda perhudica pa informa pueblo y gana nan pan. Segun e abogado, cu no por keda sorprendi cu te cu aña pasa no a actua contra e scuchamento di radio di Polis.

Na opinion di abogado, envez cu politica a scoge un forma pa evita cu ta bay asina leu Ministerio Publico a dicidi di persigui cierto miembronan di prensa. Despues cu un politico a wordo investiga e Minister di Husticia a cuminsa cu investigacion riba radionan di Polis cu a wordo perdi. Na opinion di mr. Lejuez, esaki ta mustra cu Ministerio Publico a cuminsa riba insistencia di Minister di Husticia cu un investigacion.

E abogado a bisa Hues cu tanten cu no busca un solucion, miembronan di prensa lo sigui busca manera pa haya informacion. El a mustra cu riba cellular Samsung tin programanan pa scucha radio di Polis. Esaki ta duna impresion e importancia pa scucha noticianan di Polis. E abogado a bisa Hues cu no ta bay aki pa scucha Arestatie Team, Landsrecherche, etc. kendenan tin nan mesun forma di comunicacion.

E abogado a mustra cu na Hulanda tin pa añas un sistema di alarma pa prensa. Esaki ta obligatorio pa Polis na Hulanda, caminda ta alarma entre otro prensa ora di incidentenan serio entre otro tiramento, demostracionnan, hincamento, accidentenan serio, explosionnan, etc.

Na Rotterdam y Den Haag, Polis aña pasa a cuminsa cu alarma automatico na prensa di incidentenan. Prensa na Hulanda no mester di busca otro forma pa yega na informacion di Polis. Na Aruba, politiconan y Ministerio Publico a dicidi di atende esaki cu caso penal.

Mr. Lejuez ta haya cu no por ta asina cu ta bay castiga miembronan di prensa pa un problema cu por wordo soluciona na formanan mas humanitario. El a mustra cu R.T. a yega di yuda Polis den caso di asesinato. E rumannan T. ta trahando pa e website cu R.T. tin, pa e mantene su famia. Door di e caso aki a afecta T. cu e ta bao tratamento di un psychiater.

Hues a pospone e caso pa 8 Januari 2020 caminda lo bay trata e caso contra e agente di Polis A.M. y despues e rumannan T. tin ultimo palabra. Despues di esey, Hues lo stipula un fecha pa sentencia.

- Advertisement -

DUNA COMENTARIO

Please enter your comment!
Please enter your name here