Ted Hashman, Presidente:
ORANJESTAD (AAN) – Den un entrevista cu DIARIO, sr. Ted Hasham, presidente di Fundacion pa Hende Homber, a comenta cu ta masha dificil pa haya miembronan pa e fundacion.
El a menciona cu normalmente, nan tin lecturanan, programanan y ta organiza fiesta. Pero hopi hende homber ta laga di desea e ultimo temporadanan aki.
Hopi hende ta bin na e fundacion pero pa bin tuma conseho, pa Hashman coach nan pa bay den e direccion cu nan mester di dje. Pa e temporada di fiesta di fin di aña e mes no ta bay ta na Aruba pero ta bay pone tur cos up to date.
Pa Dia Internacional di Hende Homber e fundacion a pone palabranan di felicitacion riba facebook. Nan a haya un peticion pa duna un lectura, pero e persona cu ta haci esey pa e fundacion tabata trahando y pe a bira dificil.
E team cu ta traha cu e fundacion ta chikito y nan tin cu bringa pa duna ayudo na e hendenan homber cu rekeri di esey.
Hende homber sa pasa den situacionnan dificil tambe pero nan ta mas timido, nan tin miedo. Nan ta bin si, pero hopi scondi y e fundacion tin cu traha cu esey.
Nan ta hayando un average di 15 pa 20 hende homber, anualmente, cu ta bin pa yudanza, pero pa tuma e tempo pa bin na e fundacion ta dificil, podise pa miedo of machismo.
E situacion mas grandi cu tin ta problema familiar, unda e homber ta wordo abusa pero na un manera fini. El a comenta cu na Aruba tin hopi caso di hende homber abusa na cas, cu hasta e tin temor di bisa con hopi nan ta, pero nan ta keda hopi mas tapa.
Hashman a haci un yamado na hendenan homber cu kier bira miembro di e fundacion. No mester ta profesional, pero e fundacion mester tin un bestuur. Si nan tin e bestuur “up to date” nan por sigui traha pasobra nan no tin miembro. Nan tin miedo pa nan pareha wak nan, loke no mester ta. Nan mester ta homber para den nan zapato y join e fundacion, bira miembro di e bestuur.
