ORANJESTAD (AAN): Recientemente a tuma luga na Gamma IT Solutions un coding workshop pa hobennan entre 13 cu 18 aña.
E hobennan a disfruta di un mainta unda nan por a reta nan mes cu diferente ehercicio, entre otro e ‘marshmallow challenge’, unda nan mester a uza nan creatividad pa traha un structura cu material limita.
E parti di coding a wordo duna door di Rainier Gaari y Clifford Croes cu ta Software Developers di Gamma IT Solutions. Rainier Gaari a siña e hobennan e lenguahe di Java y Clifford Croes a duna e parti di e lenguahe C#.
Ademas, e hobennan a ricibi informacion tocante con IT ta wordo uza den media y den e parti di diseño, cual a wordo duna door di Desmond Nicholson, IT Manager di Gamma IT Solutions.
Gamma ta sumamente contento di por a partner up cu Futura pa un otro coding workshop exitoso y ta gradici Futura pa promove innovacion y tecnologia den e comunidad di Aruba.
E siguiente coding workshops lo cuminsa bek na aña 2020.
