Home Parlamento Gobierno no ta dunando balor y respet na maestronan na Aruba

Gobierno no ta dunando balor y respet na maestronan na Aruba

30
0
SHARE
- Advertisement -

Parlamentario Jennifer Arends-Reyes

ORANJESTAD (AAN): E siman aki, Parlamentario Arends-Reyes di AVP a splica cu nan por a miray scucha maestronan pa basta tempo caba ta manda carta y ta vocifera nan preocupacionan na gobierno.

Tin desaroyo nobo pero cada biaha e desaroyonan aki no ta na beneficio di maestronan. Mas nan ta worde perhudica, mas nan ta worde intimida di tur skina directo y indirecto via medio social y prensa y asina nan no ta sinti nan mes comfortable ni liber pa expresa nan mes.

Esey ta e realidad cu nos ta bibando aden na 2019, duna tur cu kier expresa nan mes e espacio pa haci’e. Despues cu fraccion di AVP a pidi un reunion publico na varios ocasion, ainda e maestronan ta wardando pa e reunion worde yama. Tabata tin varios manifestiacion exihiendo pa pone mas atencion riba e condicionan y trabao mes di maestro cu ta exigi atencion.

Cu tur respet pa tur dia di estudio pa maestro, inovacion ta bon den Enseñansa pero corda cu maestronan ta e curason di Enseñansa si no percura pa scucha nan y tuma nan na serio no lo tin ni begeleider manera cu e Minister su vision ta pa e tarea di maestronan den Enseñansa den futuro cercano.

Na momento cu un grupo di maestro a forma y pidi pa atencion pa seguridad y a sinta cu gobierno riba e tematica aki te ainda no a logra yega na solucion duradero. Ora cu maestronan a pidi atencion pa e presion di trabao, nan a bisa nan pasa via dokter di cas pa worde verwezen pa un psychologo caminda antes tabata tin un profesional special pa atende maestronan a base anonimo, asina Teacher’s Care a pasa pa pasado.

Cartanan di inquietud di maestronan a yega Parlamento y gobierno, Minister Lampe a contesta door di splica su maneho y su punto di bista. Lo tabata bon pa wak e inquietudnan mas di cerca pa wak unda ta raiz di e problemanan cu den practica y bista di maestronan no ta bay bon. Gobierno te ainda ta debe un grupo di Maestro oranan cu nan a traha desde cu scol a habri y no a worde paga p’e, cu ta algo cu ningun otro dienst no lo acepta pa traha sin pago.

E balor di salud y vitalidad di nos maestronan ta importante enbes di reenforsa Human resource y Teacher’s care pa guia y yuda ta mira con liher por get rid di maestronan cu experiencia. Pa corta gasto maestronan cu contract no sa si nan trabao lo continua.

Si hasta na Hulanda falta maestro, ta di unda lo kier haya maestro? Un punto sigur tambe cu ta bon pa menciona ta e parti di ‘equal work is equal pay’ pa profesionalnan cu no a studia  pedagogia pa duna les, mester tin cautela cu e pensamento y maneho aki pa tur vak mirando cu a uza esaki pa Avond onderwijs pero no por hala maestronan un banda manera cu a sosede luna pasa na Enseñansa anochi.

E sindicatonan Simar y Seppa a uni hunto cu otro sindicatonan pa habri e discusion di indexering, mirando cu desde 2014 pa 2017 Aruba no tawatin un aumento den costo di bida y den un tempo cortico awor Aruba a conoce un aumento di mas cu 5% di inflacion. Despues di a rechasa e proposicion di gobierno no a tende nada mas di e negociacionan siendo cu por a tuma nota cu otro Ministerio si a yama nan sindicatonan concerni pa nan diensten y Enseñansa atrobe a keda atras.

Mescos cu tin otro Ministerionan cu si ta buscando fondo y permiso pa inverti den infrastructura, Enseñansa y maestronan no ta hayando e balor y respet cu nan merece. Ta di con tin un presion asina grandi pa continua corta den Enseñansa? Si kier corta den presupuesto mas cu 12 miyon na extra uur pa docentenan y tin plan serio pa scapa mas cu 30 miyon pa ningun mucha na Aruba mag keda sinta mas, implementa den un solo biaha y no den pilot ni fase, ta algun di e temanan cu tin maestronan hopi preocupa y cu ta exihi mas claridad riba nan. Mientras Hulanda ta inverti den Enseñansa ta tristo pa wak cu na Aruba ta sigui corta den Enseñansa sin piedad, sin corda cu e daño na nos comunidad ta despues nos lo wak e.

 

- Advertisement -

DUNA COMENTARIO

Please enter your comment!
Please enter your name here