Home Hudicial Hoben di 18 aña a hinca su mama dos biaha cu cuchio

Hoben di 18 aña a hinca su mama dos biaha cu cuchio

1265
0
SHARE
- Advertisement -

Pa motibo di hacimento di ‘black magic’

ORANJESTAD (AAN) – Un hoben dama Haitiano D.S.(18) a admiti di a hinca su mama dos biaha cu cuchio. Na opinion di e sospechoso, el a haci esaki pasobra su mama a hib’e un misa pa nan haci black magic cun’e.

Den Corte e dama D.S. a bisa Hues cu e tabata sinti manera cu ta un diabel tabata den su curpa. E mama a presenta den Corte y kier a demanda 50 mil florin di daño contra su yiu. Hues a rechaza e demanda pasobra e mama no a specifica e daño y no a presenta cu recibonan pa demostra cu realmente a sufri daño.

Ta un secreto publico cu Haitiano ta conoci pa haci ‘black magic’. Tambe cu nan tin nan ritualnan ta haci. Awor cu e dama hoben ta bisa den Corte cu su mama a hib’e na un misa y cu e pastoor a haci black magic cun’e, ta caba di confirma cu Haitiano ta haci black magic.

HINCA MAMA CU CUCHIO

E acusacion cu Fiscal a presenta den Corta contra e dama D.S. ta cu dia 13 April 2019, el a hinca su mama, e dama P., cu algun punta na cara y lomba.

Hues a puntra D.S. kico a sosode. Segun D.S. e no ta corda. Hues a bisa cu segun declaracion di e mama P. na Polis, el  a yega cas anochi y bisa cu e kier resa cu D.S. Na dado momento D.S. a kibra e bijbel di su mama den dos. D.S. a nenga y a bisa Hues cu e no kier papia di esey.

Hues a sigui bisa cu e mama a declara cu e tin miedo di D.S. pasobra D.S. ta drumi cu cuchio bou su cusinchi. E mama a bisa cu ora e bay drumi, e ta pone bou porta paña pa si D.S. drenta e camber. E anochi ey, 13 April 2019, D.S. a drenta e camber y hinca su mama cu cuchio den cara y ora e mama a core bay, el a hink’e den lomba.  P. a sali core y D.S. a bay tras di su mama. Ta bisiña a tene D.S.

Hues a bisa cu bisiñanan a mira D.S. cu cuchio den man. Bisiña a bay riba D.S. y bis’e pa pone e cuchio abao. Door cu D.S. no a haci caso, el a bay kit’e. Hues a bisa cu raport medico ta mustra cu P. tabatin hinca.

MAMA A LAGA HACI BLACK MAGIC CU YIU

Hues a bisa cu D.S. a duna declaracion na Polis y ta confirma loke su mama a bisa. El a bisa cu su mama ta haci black magic. El a bisa cu su mama a lag’e basta dia den e misa. E tabatin un saco di plastic cu linea di pisca den su camber. E tabatin intension di hinca su cabez den e saco y mare pa mata su mes. El a bisa cu dos dia promer nan a haci black magic cun’e y cu e kier a mata su curpa.

El a bisa cu banda di 9’or anochi e kier a bay drumi y a bisa su mama cu tabata lesa bijbel. El a bay coy bijbel y kibre den dos. Segun D.S. e dia ey e tabata sinti su curpa na candela. E tabatin asina tanto rabia riba su mama cu e kier a mat’e. Segun D.S. el a huy for di e misa y core bay pero nan no tabata sa cu el a bay cas. E unico cos cu e tabata pensa tabata pa defende su mes. D.S. tabata bisa cu e tabata sinti cu e tabatin diabel den dje.

YIU NO TA CONFIA SU MAMA

Hues a bisa cu D.S. a bisa cu e ta lamenta cu no a logra mata. El a bisa Hues cu e no ta confia su mama. D.S. tabata yora den sala di Corte y a bisa Hues cu e dia di e incidente e tabata sinti hopi straño. E tabata sinti manera cu e ta bira loco. E tabata sinti cu nan kier a haci algo cu su curpa e dia ey. E tabata hopi angustia y hopi rabia. Cos a bay for di man.

Hues a bisa cu segun raport di psicologo y psikiatra y Reclassering. Reclassering ta mustra cu D.S. tabatin un hubentud hopi dificil. E tabata den centro pa mucha door di e relacion cu mama no ta bon. Na e centro el a bula for di bentana. Na dado momento el a pensa di mata su curpa. Tambe cu D.S. por bira hopi agresivo ora e rabia y cu e no ta sinti cu e ta culpable. Psicologo ta haya cu D.S. tin un problema cu personalidad y cu e chens tey cu e lo por bolbe haci algo asina. Psikiatra ta bisa cu D.S. tin hopi problema y problema cu su mama. Psikiatra ta haya cu D.S. tin un trauma. D.S. lo ta scucha stemnan cu ta papia cun’e pero en realidad no ta asina. Ora cu D.S. ta sinti peliger su reaccion ta cu e mester ataca. psikiatra ta haya cu D.S. no ta completo responsabel pa su actonan y e chens ta grandi cu e lo bolbe haci. Psikiatra ta recomenda cu D.S. mester di tratamento.

D.S. mes a bisa Hues cu e no ta haya cu e mester di tratamento. El a bisa Hues cu no ta asina cu e ta scucha stemnan. Hues a remarca cu si Reclassering, psicologo y psikiatra ta haya cu D.S. mester di tratamento, por bien ta cu esey lo por yuda D.S. E sospechoso a bisa Hues cu e kier ayudo.

Fiscal a remarca cu D.S. a bisa cu e problemanan a cuminsa ora cu su mama a hib’e misa. Sinembargo D.S. tin un carchi di castigo caminda tabatin hopi problema cu su mama. Segun D.S. cos no tabata bay malo. E tabata yuda su mama y hasta cushina pa su mama. Ora el a bay misa, e pastor a cuminsa haci ritual cu su mannan y el a sinti kima na su wowo. Segun D.S., e ora ey tur cos a bay malo.

DEMANDA

E mama P. a demanda 50 mil florin pa dañonan cu D.S. a haci den e cas entre otro aparatonan electronic.

FISCAL

Fiscal a bisa Hues cu e ta haya legalmente proba cu D.S. a hinca su mama den cara y lomba. Na Polis el a admiti di a hinca su mama y kier a sigui hinca su mama te ora su mama muri. Fiscal ta haya cu aki por papia di intento di causa herida severo. Tambe cu D.S. a kibra e bijbel. Tin raport di psicologo y psikiatra cu ta mustra cu D.S. no ta completo responsabel pa su actonan. Na opinion di Fiscal, esaki ta un caso hopi serio y D.S. tin suerte cu cos no tabata asina grave. Fiscal a bisa Hues cu e ta tene cuenta cu tur e raportnan cu ta mustra cu D.S. mester di guia, cu e kier of no. Fiscal ta haya cu mester aplica e ley hubenil y e medida cu e mester wordo interna den un centro. Pa loke ta e demanda di daño di e mama, Fiscal ta haya esaki no ta suficiente splica. El a pidi Hues pa declara esaki no admisibel y cu e mama por cuminsa un caso civil.

ABOGADO

Abogado mr. Paesch a remarca cu no por papia di herida severo pasobra for di raport medico ta papia di algun herida. No ta papia di si nan ta hundo y con serio esakinan ta. E acusacion di intento di mata no ta al caso. E abogado ta haya cu D.S. no ta responsabel pa su actonan. El a mustra riba raport di psikiatra cu ta mustra riba e problema mental cu D.S. tin. Psikiatra ta haya cu D.S. ta menos responsabel pa e hincamento. Psicologo tambe ta conclui cu D.S. ta menos responsabel pa su actonan. D.S. tin carchi castigo pero no cu el a wordo sera den KIA. E abogado a bisa cu D.S. tin problema pero no por haya e atencion pa esaki den KIA. El a pidi Hues pa rechaza e demanda di daño.

Hues a sera tratamento di e caso y a bisa cu 22 November 2019 e lo dicta sentencia.

 

- Advertisement -

DUNA COMENTARIO

Please enter your comment!
Please enter your name here