Home Hudicial Homber cu mas di 25 mil download di pornografia di mucha a...

Homber cu mas di 25 mil download di pornografia di mucha a presenta dilanti Hues

201
0
SHARE
- Advertisement -

Fiscal a exigi 1 aña y 8 luna di prison y Hues a duna menos

ORANJESTAD (AAN): Diabierna mainta e homber S.L., acusa cu entre 27 Augustus 2018 y 4 Juli 2019, a download porno di mucha, a presenta dilanti Hues y a scucha Fiscal exigi 1 aña y 6 luna di prison y 10 luna condicional.

Hues a haya S.L. culpable di a download mas cu 25 mil biaha porno di mucha y a conden’e na 18 luna di prison di cual 10 luna ta condicional. DIARIO por a compronde cu ayera caba S.L. a wordo laga liber.

   SOSPECHOSO A ADMITI:

Tratamento di e caso a bay basta liher pasobra tanto S.L. como su abogado mr. Illes a bisa Hues cu nan ta di acuerdo pa considera tur loke ta skirbi den e procesverbaal trata caba ya cu S.L. a admiti esaki.

Hues a puntra S.L. tocante e download di pornografia di muchanan chikito. Segun S.L. esaki ta un adiccion y sa cu esaki no ta corecto. Segun Hues e malo di loke S.L. a haci, ta cu door di ta download asina hopi, e ta mantene e mercado di abuso di mucha chikito.

Hues a mustra cu psycologo den su raport riba S.L. ta bisa cu S.L. ta conciente cu loke el a haci no ta bon y cu S.L. ta responsabel pa su actonan. Psycologo a constata cu S.L. tin problema di expresa su mes ora e ta rabia. Na opinion di psycologo, e chens ta grandi cu S.L. lo bolbe haci esaki. S.L. a bisa Hues cu ora e dicidi di haci cambio den su bida, e ta haci’e.

El a mustra cu anterior e tabata huma y a tuma decision di no ta huma mas. Tambe cu el a dicidi di no ta core brommer bou influencia. Hues a mustra cu Reclasering ta haya cu S.L. mester guia di psycologo.

Hues a bisa cu apesar cu S.L. ta bisa cu ora e tuma decision e ta mantene, e ta haya cu S.L. mester di ayudo. Hues a mustra cu ta practicamente 1 aña e tabata download pornografia di muchanan chikito. Ya S.L. tin practicamente 6 luna ta sera pa e caso aki. E no tin carchi di castigo.

MAS CU 25 MIL PELICULA DI PORNO DI MUCHA:

Fiscal a bisa Hues cu tin RST (Recherche Samenwerking Team) a haya un network di autoridad Americano pa check kendenan lo ta download pornografia di mucha. Tin un proteccion di mucha pa evita pornografia di muchanan chikito.

E network ta haci posibel cu pa haya sa kendenan ta download pornografia di mucha. Asina RST na Curacao a notifica Ministerio Publico di Aruba pa haya sa di IP adress di esnan cu ta usando download di pornografia di muchanan chikito.

Na Augustus 2018, miembronan di RST a bin Aruba y a haci investigacion hunto cu autoridad di Aruba. Via Setar a haya IP address. Na 2019 a haci investigacion y a confisca na cas di S.L. un total di 18 USB Memory sticks y cantidad di articulonan.

Fiscal a mustra cu S.L. tabatin mas cu 25 mil download di pornografia di muchanan bou di 18 aña. Tabatin download di muchanan di entre 4 y 6 aña caminda ta mira con nan ta wordo abusa. Fiscal ta haya cu S.L. tabata manda download pa otronan.

FISCAL A EXIGI CASTIGO DI PRISON 

Fiscal a mustra cu segun ley tin castigo entre 4 y 8 aña di prison. El a mustra cu aki ta trata di pornografia di muchanan menor di edad cu ta wordo abusa. Fiscal ta haya cu door di S.L. su actitud a yuda mantene e mercado di abuso di mucha.

Fiscal a bisa Hues cu ta promer biaha cu a cuminsa un caso penal contra download di pornografia di mucha menor di edad. El a bisa cu Ministerio Publico ta stipula un maneho di castigo di 12 luna di prison pa promer biaha pa download, pa reparti download ta bira 18 luna di prison y si ta pa un tempo largo e ta bira 24 luna di prison.

Pa cu castigo pa S.L. Fiscal a bisa cu e ta tene cuenta cu ta durante un periodo largo a haci esaki. El a mustra cu na Hulanda tin sentencia caba cu ta castigonan combina pisa. Den e caso aki tabatin un cantidad di USB sticks cu pornografia di mucha.

Fiscal ta haya cu S.L. ta realisa cu loke a haci no ta bon y cu e ta dispuesto pa haya guia. Tambe el a tene cuenta cu S.L. a perde su trabou door di e caso aki. Fiscal a exigi 24 luna di prison di cual 6 luna ta condicional cu un tempo di prueba di 2 aña bou guia di Reclasering.

   ABOGADO:

Abogado mr. Illes a bisa Hues cu ta promer biaha cu tin un caso asina na Corte. Su cliente a admiti di a download y reparti pornografia di mucha. Ta un caso serio y a pidi Hues pa tene cuenta cu e situacion di S.L.

E abogado a mustra cu S.L. ta core riesgo di por perde su cas pasobra e no ta pagando hypoteca. Ta asina cu e tin algun cent gespaar y por mantene su cabez riba awa pero no pa mucho mas tempo.

E abogado a bisa cu S.L. ta dispuesto pa haya guia. El a menciona un sentencia di Hulanda pa un persona cu tabatin 10 mil download mas cu S.L. y a haya 200 ora di trabou pa comunidad. Na opinion di e abogado, si Fiscal ta compara cu Hulanda y kier sigui e maneho cu Hulanda ta hiba, mester bin cu tur caso.

E ta haya 24 luna sera na Hulanda ta otro cu 24 luna sera den KIA.  El a pidi Hues pa condena S.L. na un castigo combina esta 1 aña di prison di cual y 6 luna ta condicional.

   SENTENCIA:

Hues a sera tratamento di e caso y a bisa cu ta bay evalua un rato si lo dicta sentencia di biaha. Despues di a evalua, Hues a bisa cu e ta dicta sentencia di biaha. Hues ta haya legalmente proba cu S.L. tabata download y manda pornografia di mucha. Hues a remarca cu ta mas cu 25 mil downloads S.L. a haci y esaki ta contribui di cu otronan ta sigui haci abuso di mucha pasobra ta crea mercado pa esaki.

Hues a sigui bisa cu ta promer caso penal na Aruba, siendo cu na Hulanda si tin mas caso y a crea hurisprudencia. Hues a bisa cu manera Fiscal a bisa, pa cu e castigo ta mira na periodo cu ta mas o menos 1 aña. Tambe ta mira S.L. su actitud, caminda S.L. a admiti y reconoce su fayo.

Segun hurisprudencia na Hulanda, pa promer biaha enfasis ta pa evita cu lo bolbe haci mesun cos y ta duna castigo combina. Hues a bisa cu esey e ta bay haci tambe. Fiscal a menciona algun sentencianan di Hulanda y Hues tambe kier haci esaki. Hues a usa sentencia di e aña aki na Hulanda, caminda a duna 4 luna y trabou pa comunidad.

El a mustra cu na 2018 tabatin un sentencia pa un caso mas pisa pa 17 aña y 57 mil downloads, a duna 6 luna di prison di cual 3 luna ta condicional. Na 2014 tabatin e caso cu a haya hopi atencion na Hulanda,  caminda a condena e culpable na 24 luna di prison di cual 12 luna ta condicional. Pa e caso di S.L., Hues ta haya exigencia di Fiscal mucho halto.

El a condena. S.L. na 18 luna di prison di cual 12 luna ta condicional cu un tempo di prueba di 3 aña. Esaki cu e condicional special cu S.L. lo ta bou guia di Reclasering cu por encera guia di psycologo. Hues a bisa cu e sentencia ta nifica cu awe S.L. ta sali liber. DIARIO por a compronde cu ayera caba a laga S.L. liber.

Manera ta conoci, Ministerio Publico tin 2 siman pa apela. E forma con Fiscal a traha su cara ta duna e impresion cu e chens ta hopi grandi cu Ministerio Publico lo apela e sentencia aki. Tempo lo mustra si esey ta sosode of no.

 

- Advertisement -

DUNA COMENTARIO

Please enter your comment!
Please enter your name here