E mucha a wordo condena pa maltrato cu arma na 2 aña di cuido interna
ORANJESTAD (AAN) – E mucha muher Haitiano D.S.(18), a wordo declara liber pa e acusacion di intento di mata su mama y intento di maltrato severo pero ta wordo haya culpable di maltrato cu arma. Esey ta e conclusion di Hues den e caso penal cu Ministerio Publico a cuminsa contra D.S. D.S. ta wordo acusa cu riba 13 April 2019, a hinca su mama dama P. cu algo punta na cara y lomba.
Algun siman pasa tratamento di e caso a tuma lugar caminda Hues a puntra D.S. kico a sosode. Segun D.S. e no ta corda. Hues a bisa cu P. a yega cas anochi y bisa cu e kier resa cu D.S. Na dado momento D.S. a kibra e bijbel di su mama den dos. D.S. a nenga y a bisa Hues cu e no kier papia di esey. Hues a mustra cu e mama a bisa Polis, cu e tin miedo di D.S. pasobra D.S. ta drumi cu cuchio bou su cusinchi. E mama a bisa cu ora e drumi e ta pone paña bou porta pa si D.S. drenta. E anochi ey D.S. a drenta e camber y hinca su mama cu cuchio den cara y ora e mama a core bay, el a hink’e den lomba. E mama P. a sali core y D.S. a coy otro cuchio y bay tras di su mama. Bisiña a tene D.S. Segun D.S., ta door cu su mama kier a haya bruheria cun’e. E mama lo a hib’e na un misa y e pastoor a haci cierto ritualnan cu D.S. Segun D.S., ora e pastoor tabata haci ritual el a sinti manera un candela den su curpa y el a ranca for di esnan cu tabatin’e wanta y core bay.
FISCAL
Fiscal a bisa Hues cu e ta haya legalmente proba cu D.S. a hinca su mama den cara y lomba. Na Polis el a admiti di a hinca su mama y kier a sigui hinca su mama te ora su mama muri. Fiscal ta haya cu aki por papia di intento di causa herida severo. Tambe cu el a kibra e bijbel. Tin raport di psicologo y psikiatra cu ta mustra cu D.S. no ta completo responsabel pa su actonan. Ta un caso hopi serio y D.S. tin suerte cu cos no tabata asina grave. Fiscal a bisa cu e ta tene cuenta cu tur e raportnan ta mustra cu D.S. mester di guia, cu e kier of no. Fiscal ta haya cu mester aplica ley hubenil y e medida cu e mester wordo interna den un centro. Pa loke ta e demanda di e mama di 50 mil florin, Fiscal ta haya cu esaki no ta suficiente argumenta. El a pidi Hues pa declara esaki no admisibel y cu e mama por cuminsa un caso civil.
SENTENCIA
Recien Hues a dicta sentencia caminda Hues a bisa cu e ta declara D.S. liber di a purba mata su mama. Hues no ta haya cu D.S. a causa peliger di morto y tampoco intento di maltrato severo. Hues a mustra cu e raport medico ta papia di heridanan leve. Hues a sigui bisa cu e ta haya proba maltrato cu arma.
Hues a bisa cu el a evalua e raportnan di psicologo y psikiatra cu ta mustra cu D.S. mester di tratamento. Hues a bisa cu teniendo cuenta cu D.S. tin 18 aña, e lo aplica ley hubenil y cu D.S. mester haya tratamento pa su problemanan mental. Hues a mustra cu psikiatra ta haya cu D.S. no ta responsabel pa su actonan. Psikiatra ta haya cu D.S. mester haya tratamento den un centro of en todo caso un lugar sera. Hues a ordena pa D.S. wordo interna den un centro pa 2 aña. Hues a bisa tambe cu no necesariamente mester ta KIA. El a rechaza demanda di daño di e mama.
