Lama Mericano ta bira mas bruto cu nunca
*Constitucion democratico sumamente solido ta centro di suspenso
*Baha Trump mester determina kende lo ta lider di Partido Democrata
ORANJESTAD (AAN) — Lama politico na Merca ta mas bruto cu nunca mientras cu su opositornan politico ta trata na baha Presidente Donald Trump.
E problema mas grandi pa tur partido envolvi ta keda e Constitucion democratico sumamente solido cu ta evita cu un hala di e sistema politico por afecta e otro sin garantia cu ley ta na peliger.
E dirigentenan di Partido Democrata opositor di Presidente Trump, kier baha e lider gubernamental Mericano y kier pone e proceso den accion prome cu Pasco.
Preguntanan grandi ta surgi riba e tema cu cual nan kier baha Trump y cu ta na beneficio directo di e candidato Democratico Joe Biden, cu a sirbi como Vice Presidente di Presidente Obama cu sinembargo no tin siguransa cu e lo bira e candidato Democrata.
E eleccionnan primario den seno di e partidonan politico mes, mester determina kende ta bira candidato presidencial di e partido Democrata.
Te ainda e partido Democrata no tin un indicacion kende lo ta su candidato pa e proximo eleccion y esaki ta haci e lama politico na Merca mas bruto.
Joe Biden ta uno faborito pero tambe Warren cu tin mes popularidad cu su persona.
Den Partido Republicano e union ta mas estrecho cu nunca y hasta a cuminsa campaña pa Donald Trump pa proximo eleccion.
Miembronan cu experencia den Partido Democratico tin miedo di e peligernan cu tin pa su partido si e Cas di Representantenan den Congreso di Merca, cu ta wordo domina pa partido Democrata, no logra den nan intento.
Te ainda e mayoria di Republicano a keda fiel na Trump aunke casi mita di total di votadonan kier pa logra baha e actual Presidente. Esaki sinembargo no ta honra e sosten total cu tabata tin tempo di Richard Nixon cu a baha den un circunstancia diferente na esun actual.
Segun Trump e actual intentonan pa baha su persona no tin ningun otro motibo real cu no ta esfuerso di Democrata pa soluciona nan problema interno pa yega na un candidato.
E lama politico na Merca ta sumamente bruto. Pero den e furia e Constitucion, uno di e leynan basico mas democratico na mundo, ta para firme riba loke por y loke no por.
