Minister Dangui Oduber a splica tocante:
ORANJESTAD (AAN) – Ministerio di Salud a organiza un simposio den cual a participa tur stakeholders y tur hende cu ta atende cu personanan cu tin problema mental y adiccion.
E simposio a tuma lugar na Surfside Marina y a carga e nomber di “Onderweg naar een integrale aanpak voor geestelijk gezondheidszorg”.
E meta di e simposio aki ta pa busca solucion pa e problema di adiccion na Aruba.
E mandatario a splica, den entrevista cu DIARIO, cu ta importante pa trece e veld hunto pa duna informacion y comparti cu e trahadornan riba e tereno aki di salud mental y adiccion, kico tur gobierno ta haciendo durante e dos prome añanan den gobernacion, kico ta su vision, kico su maneho y kico gobierno kier pa wordo ehecuta durante e siguiente dos añanan.
E dignatario a menciona cu el a splica tur e stakeholders kico tur gobierno ta haciendo, y cu nan a institui un fact team, cu e fondonan di “social crisis plan” y a expresa cu e ta hopi gradici pa e colaboracion brinda pa su colega, minister di asunto social cu a pone fondonan disponible pa e fact team pa yuda e mucha y hobennan cu tin problema mental of di adiccion.
Minister di salud a menciona cu pa prome biaha despues di binti aña, gobierno a cuminza haci un investigacion riba consumo di substancia prohibi, pa haya informacion y data. Data ta yuda pa ehecuta e maneho ya cu sin data ta dificil pa haya sa kico ta e gravedad y con e situacion ta eyfo.
“Nos sa cu e problema di adiccion ta grave, cu e ta grandi, nos ta mire, y pesey ta importante pa nos haya e informacion aki pa medio di un investigacion.
E investigacion aki ta wordo termina na Maart 2020, y logicamente nos ta bay presenta esaki na comunidad y prensa tambe pa tur hende ta sa y ta conciente con grave e problema aki ta”, Minister Dangui Oduber a señala.
E mandatario a sigui bisa cu gobierno a pone fondo disponible pa e programa “Bismarck” cu ta un programa di FADA cu ta bay tur scol pa concientiza e muchanan specialmente, kico ta consecuencia ora un persona bira adicto na droga, alcohol, wega di placa, etc. Esaki ta un programa sumamente exitoso.
Tambe a cuminza inverti den e NKZ Opleiding, pa asina aumenta e profesionalismo di tur persona cu ta traha den e veld. Tambe gobierno a institui un comision di indicacion cu ta evalua tur caso individual pa wak si un persona no por wordo yuda na Aruba, e ta wordo manda na Corsow, Colombia of Santo Domingo.
Minister Oduber a subraya cu un comision asina ta hopi importante, y door di e comision aki tur instancia ta wordo bishita pa wak ki clase di cuido ta wordo duna, con nan ta yuda e personanan cu tin problema mental of di adiccion y con nan ta wordo rehabilita.
E dignatario a subraya cu importante den e maneho di gobierno ta obviamente, cu nan kier pa mehora e cuido pa e ta mas accesible y pagable tambe, y logicamente un calidad halto di servicio y cuido.
Minister di salud a agrega cu gobierno ta bezig na FMA (Fundacion Maneho Adictonan Ambulante) unda a cambia e hunta di supervision, lo busca un director pa maneha e compleho y lo inverti den infrastructura pa hacie mas actualiza.
“Tur cos ta costa placa pero nos kier bin cu un programa nobo pa tur esnan cu tin problema na Aruba, pa por wordo atendi aki mes, aunke no tur caso por wordo atendi na Aruba, pero nos ta convenci cu si tur hende traha hunto, nos por ofrece e ayudo necesario. Mi ta kere cu nos tin bon personal den veld, nos tin hopi hende cu experiencia cu ta haci e trabao noble aki y cu ta haci di curazon”, e mandatario a expresa y a gradici tur persona cu ta traha den e veld aki, cu no ta un trabao facil pa haci.
