Home Comercio KvK cu charla riba con pa atrae Arubianonan bek pa e  isla

KvK cu charla riba con pa atrae Arubianonan bek pa e  isla

49
0
SHARE
- Advertisement -

ORANJESTAD (AAN): Dialuna merdia a tuma lugar un charla na Camara di Comercio(KvK), unda cu Tom Bey a hiba palabra.

Bey ta Director di e Expo di Imigracion na Hulanda y den  un entrevista cu DIARIO el a splica cu su presentacion ta “Talent Attraction From the Netherlands”, unda cu e meta ta pa atrae yiunan di tera bek pa Aruba for di Hulanda, pa bin biba y traha akinan.

Bey a indica cu ta importante pa e companianan aki na Aruba compronde cu tin un grupo grandi di yiu di tera cu ta biba ainda na Hulanda despues cu nan a studia.

“Hopi biaha nan tin hopi conexion na Aruba ainda y nan ta papia Papiamento, pues ta hopi facil pa nan integra”.

“Awe mi ta conta esnan presente con ta e mihor manera pa atende cu esaki, pasobra hopi biaha hende ta pensa cu ta trayectonan cu ta fastioso pa regla for di exterior”.

Esaki segun Bey, kende a indica cu el a bisa esnan presente tambe kico nan por spera riba e Expo di Imigracion, cu ta bay ta na Februari di 2020.

DIARIO a puntra Bey kico ta e mihor manera pa logra atrae e Arubianonan bek pa Aruba.

El a splica cu ta hopi importante pa mustra nan cu tin trabao aki pa nan.

El a indica cu mester kita locual ta stroba nan di pensa pa bin bek.

“Si bo a ofrece nan un trabao, mester por mustra por ehempel cu por regla un caminda pa nan biba si nan no tin esaki”.

“Pues bo mester yuda nan si, pasobra pa nan e ta un decision grandi pa bandona Hulanda y bin bek Aruba”.

“Ta esencial pa bo crea suficiente contacto personal cu e hendenan aki, pa por trece nan bek”.

“Nan ta riba internet henter dia caba ta solicita por ehempel, pues na dado momento ta importante pa nan topa un hende cu por ehempel ta duna nan un business card y por traha un cita cu nan”, segun Bey.

DIARIO a puntra Bey con ta atende cu e hecho cu e salarionan na Hulanda mayoria biaha ta mihor cu e salarionan na Aruba, mirando cu si un persona dicidi di bin bek Aruba, den hopi caso e ta bay gana menos cu locual e por gana na Hulanda.

Bey a splica esnan cu dicidi di bin bek mester tene cuenta cu e hecho cu nan lo bay atras den salario.

“Hopi biaha nan sa esaki si, pero hopi biaha placa no mester stroba den esaki, pasobra nan ta buscando un otro calidad di bida cu quizas nan por haya aki na Aruba cu nan lo no por haya na Hulanda”.

“Hopi biaha nan no kier mas pa biba den e criminalidad cu tin na Hulanda, e bida rapido, of biba den e mentalidad cu tin na Hulanda”.

“Nan djis kier bay bek na e isla di unda nan a sali”, segun Bey.

- Advertisement -

DUNA COMENTARIO

Please enter your comment!
Please enter your name here