Marlon Croes, director di DOW a describi e proceso dificil di Watty Vos Boulevard

    191
    0
    SHARE
    - Advertisement -

    ORANJESTAD (AAN) – En ocasion di e apertura preliminar di Watty Vos Boulevard, e director di DOW Ing. Marlon Croes a hiba palabra.

    El a cuminza pa bisa cu e viahe aki a cuminza 25 aña pasa. El a conta cu na aña 1994 e kier a bay Hulanda bek pa studia pa otro profesion, y e director di DOW e tempo ey, Ing. Jossy Figaroa a bise cu e no por bay pasobra nan mester di dje y cu e ta dune e dos proyectonan mas grandi cu tabata tin e ora ey.

    E proyecto cu awendia ta hiba e nomber di Green Corridor y esun cu a bira Watty Vos Boulevard. E no a imagina ki trabao el a asumi e tempo ey. Ing. Croes a indica cu pa cumpra terenonan pa Watty Vos Boulevard so, a tuma 15 aña largo.

    Durante e transcurso ey cada parti cu bin cla, nan a pidi gobierno financiamento pa construi y sigui construi fase pa fase. Nan tabata haya “cero” como contesta.

    Despues a pidi e Gabinete di Hulanda si nan por a financia e proyecto aki y a bolbe haya “cero” riba e pregunta.

    Na 2019 den un combersacion cu tabata tin cu un colega di scol, esaki a puntre con ta bay na Aruba, y Marlon a conte cu e ta bezig pa 25 aña cu un proyecto, pero e no a yega ningun caminda.

    E amigo a sugeri pa e check cu un fondo di IT-3 na Washington, unda por bay na un concepto nobo di PPP, den cual sector priva ta financia. El a consulta cu sr. Figaroa y a puntre si e ta kere cu esaki ta algo pa explora. E director a bay di acuerdo y a bise pa prepara esaki y papia cu e Minister di Infrastructura e tempo ey, sra. Marisol Lopez-Tromp.

    El a bay di acuerdo tambe y a manda Ir. Croes na Washington pa dos siman, pa busca e informacion rekeri. E tres prome dianan no tabata facil pe, pasobra el a bay bisti cu e “bril tradicional” y esey a trece pe conflictonan di pensamento.

    Despues di e tres dianan ey e instructor a bise pa mihor bin Aruba bek pasobra e asunto aki no ta traha. Pero el a bise cu gobierno di Aruba ta pague pa e haya training anto wak p’e dune training. Esaki a caba y asina a cuminza introduci e concepto nobo, aki na Aruba.

    Despues, ora cu Gabinete Eman a tuma e mando, e minister di infrastructura e momento ey a tuma e rienda, y a tarda  hopi tempo pa convence kico ta un PPP, pero e ora ey a cuminza cu e trabaonan di preparacion. A cuminza cu un trayectoria hopi largo unda mester a cambia e ley y bin cu un Landsbesluit nobo.

    E trabao tabata asina pisa cu na dado momento el a perde den e proceso pero e team cu a traha cune ta un tremendo team, cu por a sigui.

    Despues di e destaho publico, dia 23 di Februari 2017, na New York, Baking Corporation y AIB Bank a dicidi di financia e proyecto por completo, y dos luna despues a cuminza cu e trabao, y awo, despues di un tiki mas cu 2 aña y mey a pasa e parti di mas dificil.

    Tabata tin hopi keho di comunidad, door cu e trafico tabata wordo hala, pero progreso y evolucion ta rekeri pa dal dos of tres stap atras pa dal cuater pa ocho stap dilanti.

    “Awe nos ta yega e fecha pa hacie accesible pa e comunidad, y mi ta pidi pueblo di Aruba haci bon uso di dje, huiciosamente, den sentido di saca e cabes maximo for di e fluho di trafico y tambe pa e seguridad den trafico”, el a expresa.

    Finalmente el a gradici e team completo cu a traha riba e proyecto aki, e ex-minister di infrastructura, y minister actual Otmar Oduber.

    - Advertisement -

    DUNA COMENTARIO

    Please enter your comment!
    Please enter your name here