Home Parlamento Mike de Meza su decision di hedging a costa pueblo di Aruba...

Mike de Meza su decision di hedging a costa pueblo di Aruba 230 miyon florin

80
0
SHARE
- Advertisement -

Parlamentario Endy Croes:

ORANJESTAD (AAN): Parlamentario Endy Croes ta hopi contento cu awor tin claridad cu cifranan riba mesa pa por comproba e desaster di Mike de Meza y AVP pa cu e mal decision alrespecto hedging di Heavy Fuel Oil pa WEB.

No obstante mester acentua cu staff di WEB a duna un presentacion sublime y hopi profesional contestando masha hopi pregunta pa asina trece claridad.

WEB ta den full swing cu nan proyecto ARES (Aruba Renewable Energy Strategy) cual un otro dia nos lo bin mas profundo riba dje.

Alabes WEB a splica nan vision y nan “motto” esta Reliable-Affordable y Sustainable banda di Safety pa nan empleadonan cual ta e driver pa WEB Aruba N.V.

Maneho y vision di MEP

Den e proceso aki Parlamentario Endy Croes a splica cu a bira hopi cla cu desde a cuminsa introduci RECIP engines na aña 2006  (Reciprocating Internal Combustion Engines ) bou di maneho y vision di MEP pa reduci prijs di coriente pa pueblo e sistema aki a aumenta eficiencia cu minimo 30% den comparacion cu e sistema bieu.

Banda di esaki introduccion di 10 molina di biento pa diversifica produccion di coriente na un manera mas limpi y confiabel cual tambe a wordo introduci na 2009 bou gobernacion y vision di MEP ta mustra awe di ta duna su fruta y ta un di e mihor sistemanan cu WEB tin te cu awe den servicio.

Energia limpi

Parlamentario Endy Croes kier enfatisa cu tur e “show green” cu AVP a bin cune durante 8 aña no a funciona y finalmente a costa WEB y pueblo demasiado placa na green conferences y finalmente WEB a haye obliga di sigui cu e vision di MEP esta pa inverti den mas planta di RECIP y SWRO.

Na 2020 WEB lo introduci 6 RECIP Unit nobo cu capacidad di produci 102 MW. E 6 unit nobonan aki por wordo converti facilmente pa traha cu LNG gas cual ta un otro proyecto den pipe line cu e vision di energia limpi y mihor prijs pa pueblo.

Proyecto di pipa di gas fracasa

Tristo den tur e proceso noble aki durante 8 aña di AVP Mike de Meza a pusha WEB den un direccion no comun. Nos tur ta corda con Mike de Meza “e spanta balente di AVP” a grita den Parlamento na 2012 cu prijs di crudo lo alcansa $500 dollar pa bari y a pusha WEB pa hedge riba 90% di fuel na un prijs di $ 92 dollar e tempo aya.

Ni dos luna despues prijs di crudo a cay bou $40 dollar pa bari mientras Aruba a keda paga e prijs di $92 dollar pa bari. Mesun Mike de Meza y AVP pusha WEB pa inverti 17 MIYON den un pipa di gas pa Ecogas cual compania mester a produci gas for di sushi y bende WEB cual proyecto a fracasa y awe ta den corte pa WEB recobra su 17 miyon di pueblo bek.

Riot Commando a bati pueblo

Nos ta corda tambe con pa motibo di e mal decisionnan aki di Mike de Meza, dia 1 di october 2014 pueblo a sali bay manifesta como cu WEB a bay den “rood” y mester a aumenta tarifa di awa y coriente.

Nos no por lubida con Mike de Meza y Mike Eman a tuma e decision pa duna autorizacion pa RIOT Commando pa subi caya y bati nos pueblo indefenso cu kincena y lastra hendenan femenino riba caya solamente pasobra nan a protesta contra e aumento di tarifa di utilidad y decisionnan debil di Mike de Meza. Prohibi pa Lubida!

Prijs di coriente y Hedging

Durante gobernacion di AVP bou Mike de Meza prijs di coriente a aumenta cu mas di 40% di .27 cent KWH (2009) pa .40 KWH (2013-2017).  Awor finalmente Parlamento a ricibi comprobante cu e deal di HEDGING di Mike de Meza a costa WEB y pues Aruba 230 MIYON florin.

Esaki ta hopi repudiable locual Mike de Meza, Mike Eman y AVP a haci cu dicho compania estatal y cu pueblo.  Parlamentario Croes ta termina splicando cu e vision nobo uso di Heavy Fuel Oil a baha  cu 40% te cu aña 2018 y ta rumbo pa baha esaki mas na 2022 door di switch pa LNG.

Parlamentario Endy Croes ta sostene WEB cu su vision nobo pero alabes tin un dolor na su curason con Mike de Meza y AVP a desgracia e pais aki den tur sentido di palabra. Nada no ta scapa AVP.

- Advertisement -

DUNA COMENTARIO

Please enter your comment!
Please enter your name here