Minister Bikker ta considera esaki otro dia historico:
ORANJESTAD (AAN) – Minister di Husticia mr. Andin Bikker, a yama un conferencia di prensa relaciona cu e firmamento di dos Landsbesluit. Uno ta referi na KIA y e otro tocante e nacemento di un dienst nobo cu ta Warda Nos Costa.
E dignatario a cuminza expresando cu esaki ta un dia historico, y a gradici e sindicatonan SEPPA y TOPA, cu varios siman a sinta diligentemente pa traha riba e conceptonan, y wak con nan por a acomoda e deseo y recomendacionnan di e sindicatonan respectivo.
Tocante e Dienst nobo Warda Nos Costa, e mandatario a splica cu esaki tambe ta historico, pasobra esnan cu tin basta aña trahando na WNC a expresa nan deseo di no ta un afdeling mas, pero nan kier ta Dienst riba nan mes.
E deseo aki Dios mediante ta bay bira un realidad, y un bez mas e sindicatonan SEPPA, TOPA y den e caso aki tambe STA a representa nan miembronan dignamente.
Minister Bikker a splica kico ta e embergadura positivo di e dos landsbesluitnan aki. E mandatario a bisa cu den ambos caso tabata tin “inspraak” pa conoce kico ta e intencionnan di e miembronan di e sindicatonan concerni.
Tocante KIA, con nan kier mira nan organizacion ya cu nan ta traha eynan diariamente, con nan deseonan ta y con esakinan por wordo refleha mas tanto posible den e plan formativo, etc.
Fuera di esaki nan expectativanan tocante nan posicion huridico, etc. Esaki ta algo democratico cu a tuma lugar, e dignatario a subraya, cu e ta bay ta cu forza retroactivo for di 1 Januari 2017.
Minister Bikker a expresa palabranan di gradicimento na Parlamento, muy specialmente na e Comision Fiho di Husticia, sr. Rocco Tjon, presidente cu diligente y constantemente a keda recorda con e status di e reorganizacion aki.
Tocante Warda Nos Costa, esaki ta bira un dienst riba su mes cu su propio presupuesto, den cuadro di e retonan cu Aruba ta experiencia, entre otro e situacion preocupante di Venezuela.
Esaki ta haci cu WNC ta bay den un dimension nobo, y cu esaki gobierno ta cumpliendo cu e deseonan di e trahadornan pa hopi aña, pero tambe e organizacion ta haya un status profesional aworaki.
“Manera ta conoci, Hulanda a pone fondonan substancial pa reinforza Aruba su fronteranan, y den esaki WNC cu Schiphol model y e ley cu a introduci desde dia 3 di Juli ultimo, tin un rol hopi substancial, importante y crucial pa desplega den esaki”. Asina e mandatario a señala.
Seguidamente, Minister Bikker a firma e respectivo landbesluitnan cu Gobernador a firma awe, y cu el a formaliza cu e sindicatonan.
