ORANJESTAD(AAN): Dialuna durante un conferencia di prensa, Minister di Enseñanza, Ciencia y Desaroyo Sostenible Rudy Lampe a papia di su bishita pa Hulanda.
El a cuminza na papia di e -Ciclovia cu a tuma lugar y e ta haya cu mas mester tuma lugar, mientras cu mas hende tin cu cuminza haci uso di bicicleta.
“Nos a inicia cu e fietsonderwijs y den e siman aki ta bay tin varios actividad y un di nan ta Diahuebs na nos scolnan, unda cu ta bay pasa un pelicula tocante di e cultura di bicicleta na Hulanda”.
“Nos ta spera cu nos mucha y hobennan cuminza tin e stimacion di bicicleta, cu ta pas den e vision di movecion y salud”.
Esaki segun Lampe, kende a indica cu e prome reunion na Hulanda tabata tocante e proyecto di bicicleta.
El a indica cu a reuni cu legislador Bruines di municipio di Den Haag, unda cu tin un cooperacion entre Den Haag y Aruba, entre otro pa loke ta promove e cultura di bicicleta.
“Nos a confirma den e reunion cu nos kier continua e relacion aki di trabao”, segun Lampe.
Maestronan di IPA y algun otro scol a haya un training y e idea ta pa otro aña mas scol participa den enseñanza di bicicleta.
