Pronto lo trata e ley “Toezicht Kansspelen”
ORANJESTAD (AAN) — Minister di Husticia, mr. Andin Bikker, den conferencia di prensa di Gobierno, Dialuna, a duna di conoce cu pronto, den e luna en curso mes, lo bay trata e ley “Toezicht Kansspelen” (Ley di weganan di placa) cu a origina na 2009 y despues, na 2014 e concepto di ley a wordo sea update, of reemplaza.
E ley aki ta den Parlamento, y gobierno kier introduci’e den e cuadro di obligacionnan cu FATF (Financial Action Task Force) y e ley aki ta pa update tur e leynan. Na 2020 gobierno ta haya un assessment, of un tipo di revision con Aruba ta preveni y combati, entre otro, labamento di placa, kiermen placa di procedencia ilicito.
Esaki ta un di e leynan cu ta haya miho control, pa loke ta trata e tema di gambling, weganan di suerte, etc., unda por gana un premio of ta gana den wega den casinonan. Aworaki e ley aki lo bay traha riba dje diligentemente.
Minister Bikker a agrega cu a surgi un mal percepcion den sentido cu e persona cu ta traha den Casino Wijzing lo wordo afecta door di e leynan aki.
E mandatario a expresa cu e por garantiza cu tur hende su cupo di trabao ta salvaguardia, y cu tin profesionnan pa tur persona cu ta traha den casino wijzing, den cuadro di e ley aki.
Pa Diahuebs e minister lo yama un reunion cu tur e empleadonan cu ta traha den Casino Wijzing pa un anochi di informacion pa splica nan y asegura nan cu nan trabao ta garantiza.
