Home Gobierno Ministro Ruiz-Maduro a comparti Resultado Preliminar di Investigacion di IMF riba Gastonan...

Ministro Ruiz-Maduro a comparti Resultado Preliminar di Investigacion di IMF riba Gastonan di Personal di Gobierno

26
0
SHARE
- Advertisement -

ORANJESTAD (AAN): Durante un conferencia di prensa Minister Ruiz-Maduro a informa cu durante di e ultimo dos simannan expertonan di Fondo Monetario Internacional (IMF) a haci un investigacion riba e gastonan di personal di Gobierno di Pais Aruba.

Gastonan di personal y gastonan di interes ta e dos gastonan mas grandi riba Presupuesto di Pais Aruba. Motibo di e investigacion aki ta cu Gobierno mester tin un bon bista riba e gastonan di personal pa na momento cu tin cu tuma cierto decisionnan pa cu Pais Aruba. E gastonan di personal no por sigui crece y mester contempla pa baha e gastonan aki pa Pais Aruba por yega na un finansa publico manehabel y sostenibel.

Den e investigacion IMF a haci un comparacion di e gastonan personal di e sector publico cu sector priva y tambe a haci un comparacion cu Paisnan mesun grandi cu Pais Aruba.

E resultadonan ta indica cu locual Gobierno ta paga na salario den sector publico ta substancialmente mas halto cu locual ta worde paga den sector priva. E gastonan di personal di Gobierno cu ta encera e empleado publico y  tambe esnan  ‘gelijkgestelden’ cu Gobierno ta subsidia nan salario. Si compara e dos gruponan aki, esnan cu ta traha den Gobierno ta gana 40% mas tanto cu esnan den sector priva y e ‘gelijkgestelden’ ta gana 20% mas tanto cu esnan den sector priva.

Den e componente di edad, den e aparato publico e edad ta birando mas grandi. Esaki ta indica tambe cu na cierto momento tin un cantidad grandi di empleado publico cu lo bay cu pensioen. Esaki lo trece su reto cune ya cu a subi e edad di pensioen.

Si compara e gastonan di personal den e aparato publico na Aruba cu otro Paisnan den Caribe, Latino America y sobra Paisnan, e salario di e trahado publico ta mas halto. En comparacion cu otro Paisnan, Gobierno di Aruba tin tambe mas tanto persona ta traha pa Pais Aruba.

Gasto di ‘overtime’ tambe ta un di e gastonan cu ta subi e gastonan di personal.  E componente di overtime den gastonan di personal ta 5%. Pa yega na esaki e expertonan di IMF a usa e cifranan di aña 2018. E presupuesto den e Departamento di Husticia ta esun cu tin mas ‘overtime’, 17% di e presupuesto aki ta bay pa paga ‘overtime’. Akinan lo mester haci un investigacion mas profundo pa analisa e motibo di  ‘overtime’.

- Advertisement -

DUNA COMENTARIO

Please enter your comment!
Please enter your name here