Director di FCCA sr. Edwin Tromp:
ORANJESTAD (AAN)—Director di F.C.C.A sr. Edwin Tromp, a splica den entrevista cu DIARIO, tocante cierto rumornan cu tin eyfo cu e prijs di e casnan popular ta bay aumenta, cu e no tin ningun indicacion internamente ni di gobierno, cu esaki por ta e caso y e no sa di unda e noticia ey a sali.
Contrario, FCCA ta trahando pa mas cu dos aña caba pa haya material mas economico pa baha e costo di construccion, y e compania ta mira cu tin sigur un 10% di spaarmento.
Esaki ta positivo mirando cu FCCA ta traha di 100 pa 200 cas pa aña, y pesey nan ta purba di haci nan esfuerzo pa tene e prijsnan unda nan ta.
El a señala cu e clientela mas grandi cu FCCA tin ta e parti abao di e mercado. Tromp a comenta cu tin hende ta haya tereno pero nan no por haya fianza ni di 70 mil florin. FCCA ta purba di yuda pa nan por traha un cas kizas no di 70 meter cuadra pero di 60, y toch yega na nan cas. Mescos pa loke ta trata huurmento di cas, cu sr. Tromp cu e compania no a hisa prijs ya pa cuater aña.
E compania a logra di haci construccionnan na e prijsnan aceptable te awor. Sr. Tromp a bisa cu obviamente nan no tin e control di e mercado cu no ta local. Si prijs di material di construccion ta subi den paisnan unda un pais ta importa logicamente e tin efecto riba e prijs. Pero FCCA no ta premira esaki ainda pa 2020.
Edwin Tromp a menciona tambe cu den negoshi tin clientenan cu ta paga bon tin clientenan cu tin problema pa paga. Esey ta sosode tur caminda y FCCA no ta un excepcion.
Tin famianan cu no ta facil pa nan paga y FCCA tin cu traha cu nan di un of otro manera. Tin dos tipo di pago: huur y hipoteca. Tin personanan cu ta huur cu ta keda hopi atrasa den e pago y kizas momento ta yega cu nan tin cu sali for di e cas, pero esaki ta den caso extremo.
E no ta mescos cu ora ta trata di un hipoteca. Ora un cliente cu tin hipoteca ta atrasa, por refinancia e prestamo y haci di un manera pa sa con e por paga, pero tambe tin momento cu si un hende ta keda seis pa ocho of diez luna sin paga.
Aworaki mes, sr. Tromp a menciona, a pone un cas na vindishi y e doño mes a sali bay cu cushina, baño, y toch mester vende e cas na vindishi.
E historianan mester wordo conta completo, Tromp a bisa, refiriendo na cliente cu ta bisa cu nan a perde nan cas pero no ta bisa cu el a keda hopi tempo sin paga. Pero FCCA ta duna e cliente un chens pero e no ta cumpli.
Director di FCCA a expresa cu su principio ta cu e no kier pa esaki sosode.
