ORANJESTAD (AAN): Recientemente a gradua di Facultad di Arte y Ciencia, Nicolette Habibe. El a obtene e titulo di ‘Bachelor of Arts’ di e programa academico Organization, Governance & Management (OGM) na Universidad di Aruba.
Nicolette a exitosamente presenta resultado di su investigacion, cu e topico di ‘e costo di importacion di fruta y berdura na Aruba; reduciendo e inconsistencia di prijs pa sigura suministro sostenibel’.
El a haci e presentacion dilanti di un comision di graduacion cu tabata consisti di su supervisornan cual ta Edward Erasmus MA, Judelca Briceño MSc y Luc Alofs, PhD. Nicolette a revisa e diferente factornan cu ta influencia e prijs di importacion di fruta y berdura na Aruba. E investigacion a analisa con e prijs ta aumenta y ki impacto esaki lo por tin riba e comunidad Arubano.
Adicionalmente a evalua e oportunidad pa por mehora seguridad di cuminda door di promove agricultura na Aruba y tambe amplia e area pa importa y acuerdo comercial. Aruba tin un area limita caminda cultivacion ta posibel y ta depende grandemente ariba e importacion di fruta cu berdura.
Nicolette ta afirma cu ta esencial pa investiga y haya un solucion sostenibel mientras cu prijs di importacion ta aumenta. Nicolette kier pa su investigacion contribui na e conocimiento cu por yuda haci cuminda salvo y saludable mas pagabel pa e consumido Arubano.
Nicolette ta sumamente agradecido na dr. Jocelyn Ballentyne y e team di UAUCU pa e guida y ayudo durante e programa. Universidad di Aruba, Departamento di ‘Organization, Governance, and Management’ y miembronan di e comision di graduacion ta felicita Nicolette cu su titulo.
Universidad di Aruba, particularmente e Departamento di OGM ta felicita e comunidad academico, amigo, famia y conocirnan pa e logro di Nicolette Habibe. Tambe ta desea Nicolette tur clase di exito pa su estudio y futuro carera.
