Resumen
Pago di belasting ta evita cu pais por papia di estafa
*Gobierno Eman no a paga pa tur e proyectonan cu el a laga atras
Ainda tin hende ta aplaudi e cantidad di proyecto cu gobierno Eman lo a realisa cu placa di pueblo. Ta berdad cu gobierno Eman a cuminsa cu cantidad di proyecto y sigur di cinco strea.
Si gobierno Eman tabata traha pa un negoshi priva, pa cualkier empresa na Aruba, e exponentenan di gobierno Eman ya ta den prizon pa estafa.
E hecho cu sin mas no por acusa exponentenan di gabinete Eman cu loke nan a haci tin tur calidad di fraude, ta debi na e realidad cu ainda tur Arubiano y hasta negoshinan y turistanan mester paga belasting y asina pone placa den caha di Aruba.
Na e momento cu gobierno Eman a cuminsa cu e proyectonan aki y a pone cantidad di empresa construi e proyectonan cu bo por topa na cantidad riba internet, e no tabata tin placa pa paga. Durante e tempo cu gobierno Eman a introduci e proyectonan aki, e tabata sa cu e mester a baha tur gasto.
Si mester a drecha e caretera entre San Nicolas y Playa mester a haci esaki na un forma cu lo no a costa un fortuna. Mescos ta e berdad pa Watty Vos Boulevard.
Pero gobierno Eman a dicidi pa introduci proyectonan sin ningun realidad pa Aruba.
Si cualkier hende a drenta un negoshi y pidi pa nan traha un proyecto manera gobierno Eman a traha y no por a duna prueba cu por paga, e negoshi lo a yama polis.
Gobierno Eman no tabata tin placa y no tabata tin ningun forma pa mustra cu e lo tin placa. E no a paga nada pero a uza e sistema di belasting di Aruba pa haci e gracia cu awe un pueblo cu a wordo gaña, den un crisis.
Gobierno Eman a dicidi pa e proyectonan y kier a uza nan pa gana eleccion, pero e tabata sa cu e pais no por paga pa proyectonan cu no ta realistico pa Aruba.
Gobierno actual sigur mester pone fin na e asunto di Green Corredor y tur e matanan ap Watty Vos Boulevard, cu pueblo no por paga ni por mantene.
E forma di planta mata ta wordo uza na paisnan caminda tin awa pa muha e matanan cu na Aruba ta muri den solo cayente y hasta e sistema di saco di plastic no por trece solucion.
E potretnan di awe ta mustra kico Gobierno Eman a bay imita.
Por bisa cu ta proyectonan espacial manera na otro paisnan conoce, gobierno Eman a topa riba internet y a introduci na Aruba cu awe mester paga pasobra gobierno Eman a duna orden na proyectonan cu e no a paga!
Aruba paga awor segun decision di gobierno Mike Eman. Ta e medidanan cu nos mester paga awor, ta hustifica tur loke nos ta skirbi aki.
Sin e medidanan Aruba no por paga proyectonan awe y e companianan ta hiba Aruba hues.
Ministerio Publico mester dicidi riba e proyectonan aki basa riba e rapport di Bo Aruba di e autoridad financiero mas halto di Aruba.
Gobierno Mike Eman, nos ta ganya?
