Oficina Central di Estadistica a anuncia resultadonan preliminar di Censo Piloto

77% di e hogarnan a coopera cu e Censo Piloto

ORANJESTAD (AAN): Manera ta conoci Oficina Central di Estadistica (CBS) a organisa un censo piloto durante e periodo di 3 di October te cu 13 di october 2019. Esaki en conexion cu preparacionnan pa cu e Conteo General di Poblacion y Vivienda (Censo Aruba 2020) cu lo tuma lugar entre 1 di October te cu 10 di October 2020.

E Censo Piloto tabata di sumo importancia pasobra a test tur e aspectonan di digitalizacion. E Censo Piloto a bay hopi bon. A logra test tur e aspectonan digital necesario pa Censo2020.

Teniendo en cuenta cu awor tin e data digital, esaki a haci posibel cu por presenta e resultadonan preliminar di e Censo Piloto den 2 siman di tempo.

Resultadonan Preliminar:

– Un total di 2.394 hogar a wordo conta cu ta encera 6.402 persona

– 77% di e hogarnan a coopera cu e Censo Piloto

– 30% di e hogarnan a dura 30-45 minuut cu e entrevista

– Di cada 100 persona, 53 tabata hende muher

– Di cada 100 persona, 65 ta naci na Aruba

– Di cada 100 persona, 43 persona ta forma parti di un famia cu ta consisti di un pareha cu un of mas yiu

– 75% di e hogarnan ta biba den un cas

– 76% di hogarnan ta doño di nan mesun vivienda

– 33% di e hogarnan tin inconveniencia di stof den nan vecindario

– 52% di e hogarnan tin un pushi/cacho di cual 48% di e cachonan y 31% di e pushinan no ta sterilisa

– 16% di e personanan entrevista tin 65 aña of mas

– 6% di e personanan entrevista tin un limitacion  y 3% mester di cuido

– 98% di muchanan (4-17 aña) ta bayendo scol

– 60% di personanan di 15 aña of mas tin conocimento/habilidad pa traha cu computer/smartphones/internet

– 64% di personanan di 14 aña of mas ta economicamente activo

– Di cada 100 persona di 14 aña of mas, 95 ta emplea y 5 no ta emplea

Di awor pa Censo 2020 CBS lo traha duro pa asina por informa e pueblo di Aruba pakico ta importante coopera cu Censo, e temanan cu ta inclui den e cuestionario di Censo y e pakico di cada pregunta.  Tambe lo indica ki informacion por prepara adelanta pa asina e entrevista bay  mas lihe.  CBS ta conta riba e cooperacion di Aruba completo.

CBS kier a duna un danki na tur persona cu a coopera durante e Censo Piloto y ta conta cu boso cooperacion otro aña tambe durante.