Home General Pica!  Peso di coalicion tabata riba lomba di Daphne Lejuez

Pica!  Peso di coalicion tabata riba lomba di Daphne Lejuez

281
0
SHARE
- Advertisement -

Resumen

Te awe interes nacional ta solamente e parti comercial di un ley  

Manera dios Atlas e tabata condena na algo cu parce sushi 

Un di e diosnan mas tristo den mitologia Gregio tabata e dios Atlas, cu mester a carga tur e peso di cielo riba su lomba.

Ora nos a analisa loke a pasa cu e miembro di Parlamento pa MEP, Daphne Lejuez, nos mester a bisa “Pica”.

Aunke hasta den tratamento di e ley di Serlimar su compañero den lucha contra e ley tabata di un partido di coalicion cu no ta MEP, Daphne mester a pasa den situacion dificil.
Nos ta lamenta e forma cu e mester a biba bou di un peso enorme di e cielo politico cu tabata riba su lomba y cu segun Lejuez ta completamente contra interes di pueblo.

Ta na interes di pueblo, dos aña despues cu el a cuminsa sostene e coalicion actual, el a dicidi cu e no ta carga e peso di cielo mas y el a bira independiente pa asina garantisa cu e ta papia manera e kier y ora e kier den Parlamento.

Algo cu ta sumamente importante ta, cu e no ta carga su peso hiba AVP, loke ta nifica cu e no ta bira parti di oposicion tampoco. E ta keda completamente independiente den tur asunto.

Nos ta aplaudi su independencia den Parlamento pero awor nos kier a pidi Daphne pa por fabor splica nos mas den detaye kico ta malo den e ley.

El a papia di interes nacional. Esaki ta haci cu nos mester haya informacion kico esaki ta nifica pasobra nos tambe ta parti di e interes nacional di Aruba.

Mester bisa cu e ultimo lunanan Daphne a haya mas atencion cu nunca. E tabata continuamente den noticia y awe lo ta bon pa e splica algo mas di e ley.

Nos ta consciente cu e ley tin un parti comercial. El a bisa cu e tabata tin cierto laso cu e no tin mas y cu su esposo….

Lubida. E parti aki no ta interesante. Nos ta papia awor di interes nacional cu ta incorpora tur hende, sin distincion di rasa, credo of origen por ehempel.

Con Arubianonan directamente ta wordo perhudica cu ley? Con Arubianonan pasobra nan ta ciudadano di Aruba, ta wordo perhudica cu e ley?

Como miembro di Parlamento, esaki ta e splicacion cu Daphne mester duna despues di a carga coalicion riba su lomba.

Nos kier haya mas informacion. Serlimar no mester cobra? Na luga di e loke e kier cobra mester bini un BBO, manera a pasa na 2014 ora despues cu gobierno anterior a baha BBO na mita, mester a introduci BBO pa AZV?

Kico ta e interes nacional cu no a wordo sirbi dor di coalicion? Pakico Daphne no a sali for di Parlamento for di e prome momento cu e prome peso di consenshi a wordo poni riba su lomba?

Pober Aruba tin un peso riba su lomba. E mester carga tur cielo di tur interes nacional sin cu hende kier splica kico ta y unda a mete directamente cu interes nacional.

Nos ta spera e contesta di Daphne cu dos aña largo a permiti politica pone peso riba su lomba. Algo sushi, si nos a comprende bon.

- Advertisement -

DUNA COMENTARIO

Please enter your comment!
Please enter your name here