Vocero di DIMP, Meverly Romano
ORANJESTAD (AAN): Ora cu fin di aña yega, hopi automobilista ta masha pendiente di e dia cu nan por cuminza paga e impuesto y busca e plachi number corespondiente na e siguiente aña.
Relaciona cu e aspecto aki, den entrevista cu DIARIO, Vocero di Departamento di Impuesto (DIMP), Meverly Romano, el a indica cu nan ta cuminza acepta pagonan dialuna 16 di December proximo.
Normalmente ta cuminza den prome siman di December, pero DIMP ta meymey di un proyecto hopi grandi cu ta preparando pa wordo lanza. Esaki ta encera e declaracion online.
Kiermen ta poniendo hopi esfuerzo pa keda cla cu e proyecto aki den e prome siman di December. Esaki a pone cu mester a dicidi pa cambia e fecha pa acepta pagonan di vehiculo di motor te dia 16 di December.
Romano a splica cu nan ta cuminza e aña aki dos siman mas laat. Tin hopi cliente cu ya caba ta puntrando y cu ta e grupo cu ta prefera di paga den luna di December.
Asina cu e fecha yega nan por haci nan pago, a agrega.
Aworaki no tin e cifranan relaciona cu e pagonan pendiente, pero ta trata di un cantidad grandi di cliente cu no a haci pago di 2019 ainda, y posiblemente di 2018 tampoco, a remarca.
E regla ta keda mescos. Tanten cu no caba di paga e añanan bieu no por paga 2020. Pesey durante e aña, DIMP ta recorda pa no keda pospone e pagonan pasobra despues financieramente ta bay cay e persona mas pisa, Romano a subraya.
BOET
E sistema di boet ta keda. Manera cu e ‘deadline’ pasa, e naheffing ta den e sistema caba. Kiermen, por ta e persona no a haya ningun papel ainda, pero den e sistema di DIMP e boet tey caba.
E boet ta 50%. Si e belasting di mitad aña ta 150 florin, e ora e boet ta 75 florin. E boet no ta algo cu ta necesario. E persona mester sa cu ta un gasto p’e. Si acaso el a cumpli na tempo, e no ta haya e boet, e PR di DIMP a declara.
E di dos mitad di aña mester tabata paga na juli caba. Aworaki tur e ‘naheffingnan’ ta den e sistema di DIMP. Kiermen pa por paga e belasting di 2020, tur belasting anterior mester ta paga caba, incluyendo e boetnan.
Manera cu un ‘tijdvak’ su deadline pasa, DIMP ta genera e ‘naheffingsaanslag’ cu ta inclui e boet.
Un persona cu no paga no ta perde su number, pero DIMP no lo wanta e number pa hopi aña. Despues di dos aña ta cuminza evalua y ta kita e number for di dje, Meverly Romano a manifesta.
