Minister Rudy Lampe:
ORANJESTAD(AAN): Minister di Enseñanza Rudy Lampe durante un conferencia di prensa Dialuna a bisa cu mas y mas e studiantenan ta ripara cu e cambernan na Hulanda a cuminza bira impagable.
Pesey a cuminza explora posibilidadnan pa yega na acuerdonan den futuro, pa garantiza cierto cantidad di camber pa nos studiantenan.
“Na Hulanda nos a reuni cu Minister di Enseñanza di Hulanda y Corsow y e representante di St. Maarten”.
“Entre otro a keda palabra cu nos Biblioteca Nacional ta bay wordo conecta cu e biblioteca real di Den Haag, unda cu ta bay tin acceso na tur e informacion digital”.
“Nos ciudadanonan ta bay tin acceso digital na e tesoro di informacion na Den Haag”, segun Lampe, kende a papia tambe di e desafionan di nos studiantenan pa termina nan estudio na Hulanda.
Pesey a cuminza cu un plan pa stimula e studiantenan keda mas tanto posibel aki na Aruba, pero den cooperacion cu institucionnan universitario di Hulanda.
“Tecnologia ta na nos fabor, pues fisicamente no necesariamente bo mester bay Hulanda, pa bo por studia na Hulanda”.
“Aworaki varios estudio universitario ta wordo ofreci online, pues esey ta un di e solucionnan”, segun e mandatario.
Esaki lo bay den cooperacion cu Universidad di Aruba.
Segun Lampe, a keda acorda cu lo explora tur e posibilidadnan den e direccion aki.
