Home Politica ‘PPA ta spera cu  hotel  ‘Secrets Baby Beach Resorts’ lo sirbi como...

‘PPA ta spera cu  hotel  ‘Secrets Baby Beach Resorts’ lo sirbi como un yabi pa desaroyo di  economia di San Nicolas y vecindario’

180
0
SHARE
- Advertisement -

Benny Nisbet PPA:

ORANJESTAD (AAN): PPA ta considera e ‘groundbreaking’ pa e prome hotel na Seroe Colorado, San Nicolas como un acto historico kizas 25 aña laat pero nos ta spera cu e lo ta significa inicio di un era nobo na San Nicolas den tur aspecto.

Palabra  di pabien  na pueblo di  Aruba en general y San Nicolas en particular  y  na tur esnan cu tin di haber cu e evento importante aki  e inversionista esta famia Marinon, Three Rivers NV, Gobierno di Aruba, Ministro Otmar Oduber y tur otro cu a contribui na e logro aki.

Historia di un vision:

25 aña pasa of mas PPA tabata e prome partido cu a presenta un vision pa desaroyo di Hotel na Grapefield y Seroe Colorado!  E presentacion aki a wordo ricibi cu sentimento mixto. Contrincante a reaccion cu ‘BENNY IS DREAMING’.

Pero den tur programa di PPA nos a proyecta desaroyo di nos East Coast etc como parcialmente dedica na turismo. Fuera di esey durante e 25 aña aki PPA a publica mas cu 150 declaracion dedica na San Nicolas y e necesidad pa construccion di hotel pariba!!

Reaccion di hopi hotel existente tabata pa pidi gobierno pa nan por expande nan hotelnan existente cu mas camber pa despues declara cu e resultado lo ta cu Aruba lo tin mucho camber y no suficiente trahado.

Tabata visible cu San Nicolas su desaroyo tabata wordo frena pa forzanan scondi pasobra San Nicolas of miho bisa ‘brug pariba’ tabata wordo mira como e  parti for di unda lo mester busca trahador y nada mas.

Sosten pa e ‘ALL INCLUSIVE’ aki!

Un realidad cu nos mester menciona ta cu PPA e.p. no tabata di acuerdo nunca  cu construccion di hotel ‘All inclusive’ na San Nicolas.

Manera conoci y menciona den varios programa di nos  PPA ta pro construccion di hotel di 4 y 5 star acopla na un Golfcourse Internacional cu lo expande e proyecto di turismo arubano.

Ora  a resulta cu Ni e  Upgrader cu a wordo proyecta como salbacion pa San Nicolas lo no tabata di bin mas PPA su directiva y conseho di partido a reuni y a conclui cu basa riba e realidad nobo aki cu lo ta bon pa sostene e  iniciativa cu Ministro Otmar Oduber a presenta esta e grupo Martinon cu lo ta dispuesto di inverti den un hotel ‘All inclusive’ na Seroe Colorado basta cu e grupo aki lo a cumpli cu condicionnan di gobierno y control di parti di Banco Central locual a tuma lugar tambe.

PPA a evalua y dicidi cu  ‘nos yuwana y lagadishi’ no por bin prome cu nos yiunan di tera cu mester di un miho futuro.

Como tal PPA a tuma e decision di sostene e  proyecto aki cu e deseo pa e  hotel aki bira e ‘yabi economico’ cu San Nicolas ta enbusca di dje masha tempo.

No cabe duda cu cada ciudadano y cada instancia lo tin nan opinion propio sea ta pro of ta contra. Pero pesey tin un gobierno cu a wordo elegi democraticamente pa tuma decision al respecto y nos ta spera cu e decision di gobierno aki  pa construi  2  hotel riba e tereno cu añanan a wordo reserva pa construccion di hotel  na Seroe Colorado a wordo parcialmente uza pa e proyecto aki.

Yabi economico pa  entrepreneur comercial ‘turistico y mas!!

PPA ta spera cu futuro  lo demostra cu  e hotel ‘Secrets Baby Beach Resorts’ lo  bira  e ‘yabi cu a habri e economia di San Nicolas’ y dune un empuhe nobo.

PPA ta desea pa por logra un desaroyo economico cu lo encera diversificacion di nos producto di Turismo pero tambe diversificacion di nos economia en general den futuro cercano.

Tambe PPA ta spera cu tur desaroyo economico lo tene cuenta cu nos forza labora disponibel riba nos Mercado di Labor y cu semper gobierno lo prepara nos forza laboral pa retonan nos dilanti.

PPA kier a cera nos comunicado  dunando un conseho na tur ‘entrepreneur comercial’ di pariba di Brug cu si bo tin  ideanan cu por contribui na mehora e infrastructura comercial/turistico di pariba di brug awor ta e hora pa inicia cu bo preparacionnan di bo vision.

Ideanan cu por nace,  crece  y floria  hunto cu e  inicio y crecemento di nos  parti turistico y nos economia en general.   Awo ta e hora ……..ban demostra cu e parti di p’ariba di brug por contribui na e producto di Aruba na un forma positivo.

Na pueblo di San Nicolas  historia a demostra cu San Nicolas tabata e  ‘raiz di nos pais’ .  Ban tuma e  inicio aki cu ‘man habri’ ..ban demostra cu San Nicolas lo contribui en grandi na desaroyo economico di futuro di nos pais stima Aruba ….!! San Nicolas  can do it!!  Nos por…We can !!

Pabien y exito na Tur !!

 

- Advertisement -

DUNA COMENTARIO

Please enter your comment!
Please enter your name here