Home Editorial Prome Ministro Evelyn Wever-Croes a rescata Status Aparte

Prome Ministro Evelyn Wever-Croes a rescata Status Aparte

47
0
SHARE
- Advertisement -

Editorial

Na 2019 Aruba mester a hiba un lucha tenaz pa e futuro di  pais. E forma cu gobierno anterior a maneha e pais, a deshaci di credibilidad di e pais enfrente Reino Hulandes.

Ayera, manera DIARIO a splica Aruba den detaye, a yega e momento importante cu Reino Hulandes mester a dicidi riba e futuro di Aruba.

Nos a trata di splica pueblo, cu intervencion Hulandes no tabata solamente un asunto di paga e debe cu gobierno anterior a laga atras. Intervencion Hulandes ta e arma cu nos pueblo mester acepta ora e tin siguransa cu Aruba mes no por produci lider pa dirigi e pais a base di balornan democratico.

Democracia ta encera cu e pais ta capaz di dirigi su economia, su asuntonan financiero, social, pues e bienestar completo di tur ciudadano.

Democracia a haya su refleho den Status Aparte di Aruba ora na man di e lider Betico Croes, Aruba a wordo reconoci como un pais capaz di asumi e papel di pais autonomo den Reino Hulandes.

E capacidad di e pais di funciona a base di autonomia, ta directamente mara na e capacidad di e lidernan na mando pa sigura cu maneho financiero, monetario y economico por duna garantia di e bienestar economico.

Pa Aruba mes por a duna e garantia aki, na 1983 Betico Croes a exigi di Reino pa Aruba tin su propio Banco Central y Florin Arubano pa asina e pais no mara su bienestar financiero y economico na decisionnan di otro pais.

Durante 2019, DIARIO cu a bira e vocero di e lucha di Status Aparte di Aruba, a bira e vocero di e lucha pa un futuro nobo pa Aruba den cual e autonomia financiero di Aruba ta central.

Nos mester a entrega prueba na Aruba con e maneho di gobierno anterior a destrui e base di Status Aparte di Aruba.  No ta solamente e pago di un debe nacional, pero rescate di nos sistema financiero y economico, cu nos a logra cu Status Aparte tabata na wega.

Ayera nos a bolbe sinti e alegria di e momento cu na 1983, Reino Hulandes a bay di acuerdo pa Aruba haya su Status Aparte. Emocion a yena nos ora a bira conoci cu Prome Ministro Evelyn Wever-Croes a logra cu Hulanda a debolbe Aruba su dignidad di pais autonomo den Reino.

E base di Statuut cu ta regla e relacion entre Aruba y Reino Hulandes, ta basa riba e forsa propio di e pais y e ayudo di un pais pa otro, ora esaki ta necesario.

E base di Statuut, cu a wordo cambia pa dia Prome di Januari 1986 Aruba por a haya su Status Aparte, a bira realidad atrobe despues cu Reino a yega na e conclusion durante gobernacion anterior cu Aruba no por carga e responsabilidad di autonomia.

Awe Aruba ta drenta un epoca nobo. Parlamento di Aruba mester dicidi si e maneho proponi pa Prome Ministro Wever-Croes ta contene e solucion pa futuro di Aruba.

DIARIO awe ta felicita nos Prome Ministro Evelyn Wever-Croes pa su logro grandi.

Nos ta celebra e porta oficial pa rescate di autonomia di Aruba y ta desea e coalicion actual forsa pa sigui dilanti y logra bienestar di nos Aruba.

Pabien Aruba! 

- Advertisement -

DUNA COMENTARIO

Please enter your comment!
Please enter your name here