Home Turismo Riba Diahuebs tabatin 11.000 turista den Waf di Playa

Riba Diahuebs tabatin 11.000 turista den Waf di Playa

21
0
SHARE
- Advertisement -

ORANJESTAD (AAN): Un biaha mas Playa tabata hopi druk riba Diahuebs.

Den oranan di atardi, gerencia di Aruba Ports Authority (APA) a confirma cu e tres barconan crucero grandi di Diahuebs, a percura pa trece un cifra record di bishitantenan pa Aruba.

Mas cu 11 mil biahero, combina cu mas di 4 mil tripulante di e barconan, a trece un bista alegre den centro di ciudad, su alrededor y rond Aruba pa esnan cu a haci uzo di e diferente tour.

Carnival Horizon a yega cu 4.468 habitante mas 1.439 miembro di tripulacion.  E barco Regal Princess tabatin 3.005 pasahero y 1.372 tripulante.  Tambe tin Carnival Breeze cu 3.733 pasahero mas 1373 miembro di tripulacion.

Tin un cambio den turismo crucero unda cu cada biaha APA ta logra pa trece barconan nobo pero tambe barconan mas grandi. Asina ya diaranson ultimo Aruba a ricibi un mega crucero MSC Meraviglia (den su prome bishita) cu a trece rond di 4.240 pasahero mas cu 1.613 tripulante.

E movecion di mas cu 11 mil bishitante den y pafo di Oranjestad, a percura pa un bon inyeccion den e economia.

Aña pasa Aruba a ricibi 334 barco cu a trece un poco mas cu 815 mil turista y tambe 289 mil miembro di tripulacion. Te cu awo Aruba a ricibi 243 barco cu a trece 608.728 pasahero, compara cu e cifranan di aña pasa di e mesun periodo cu tabata di 623.317 pasahero.

Den loke ta resto di aña e cantidad di bishitantenan crucero lo subi compara cu e prome parti di 2019 mirando cu esaki ta e temporada halto di crucero cu a caba di cuminsa luna pasa.

No por nenga cu Aruba ta keda un destinacion atractivo cerca e biaheronan crucero. Pa algun aña caba por mira cu e peticion pa Aruba no ta baha.

Otro prueba ta cu companianan crucero ta cuminsa uza barconan mas grandi riba e rutanan cu ta inclui Aruba, cu pa nos ta nifica un miho desaroyo.

Tambe loke cu a hunga un rol importante ta e synergia cu tin entre APA, ATA (Aruba Tourism Authority) y Ministerio di Turismo di Dangui Oduber pa pone cabes y recursonan hunto y traha na desaroyo di turismo en general.

E cantidad di turistanan crucero riba un solo dia ta prueba di e lasonan estrecho cu tin entre e stakeholdernan

 

- Advertisement -

DUNA COMENTARIO

Please enter your comment!
Please enter your name here