Analisis
Aruba ta drenta un siman sumamente dificil. Fin di 2019 ta acerca y ta presenta un saldo di un cadena di eventonan historico rond mundo. E situacion mundial y regional no mester paralisa Aruba cu ta na un punto decisivo, pero mester enfatisa cu mester pone Aruba y asina e Arubiano central.
E desaroyonan den nos region no mester ta sorpresa pa ningun hende. Mas ainda por conclui cu durante hopi tempo a neglisha e situacion aki, cu tin impacto directo pa bienestar nacional.
Pa awe nos por papia di Siguridad Nacional, nos mester tene cuenta cu hopi e aspecto cu instancianan oficial di Aruba a mira ora nan tabata conseha gobernantenan riba decisionnan politico cu a cay na Aruba.
Siguridad ta wordo afecta for di momento cu un persona of pais expone su mes na riesgonan. Nos siguridad personal ta wordo afecta for di momento cu nos habri porta sin puntra ta kende kier drenta nos cas. Nos siguridad ta wordo afecta for di momento cu nos ta bisa henter mundo cu nos ta un paraiso di oportunidad mientras nos mes ta crea un crisis cu ta kita pan for di nos boca.
Siguridad nacional di Aruba sigur a wordo afecta, ora a bay invita un presidente manera Nicolas Maduro pa bin habri un refineria na Aruba.
Pa ta sincero, paisnan liber grandi ta haci negoshi cu paisnan iskierdista. Pero e paisnan grandi ta proteha nan mes y nan por pone fin na un amistad of e resultadonan di e amistad.
Aruba sin reserva y planificacion, presentando mundo un situacion cu no ta berdad, a habri porta pa barconan trece ilegal y turista resulta di ta migrante scondi.
Un ehempel grandi di perde siguridad nacional for di bista, tabata sigur e forma cu a trece e proyecto Citgo.
E ponencia aki no ta algo cu nos ta inventa. E rapport di Raad van Advies riba e forma cu a atrae Citgo, ta papia di e forma cu a atende cu e parti di migracion.
Si Aruba ta cay den problema cu ta causa cu Arubianonan ta opone otro pa defende nan politiconan. ta pa falta di e informacionnan cu ta importante pa pueblo tin pero ta keda scondi.
Den caso di Citgo, Raad van Advies a papia di e control di admision di hende. E tabata importante sigur pa gobierno anterior cu a firma un contracto cu un homber manera Nicolas Maduro. Kende Maduro a trece Aruba? Nos a mira diferente cara cu Maduro mes a yuda muri den prizon of cu autoridad internacional ta busca pa criminalidad.
Den e tempo aki mucho mas persona a drenta legal of ilegal. Kico e areglo tabata pa haya papel pa traha pa sostenedonan di Maduro? Cuanto di nan a keda atras?
Siguridad nacional y di e Arubiano ta exigi pa gobernantenan pone candal na e porta di Aruba y keda cuidadoso riba tereno di migracion.
Awe nos ta parti di un region sumamente peligroso y Nicolas Maduro ta parti di e problemanan grandi di nos region. Nicolas tin tur informacion di Aruba. Nicolas tabata liber pa tene “happy hour” na Aruba.
Nos a deshaci di e peliger? Cada rato por mira figuranan di gobierno anterior ta yora na porta di refineria. Nan ta yora riba e peliger cu nan a introduci y a laga atras pa nos siguridad nacional y di e Arubiano cu nan a lubida cu mester ta central?
