Sra. Joase Ann van der Biest:
ORANJESTAD (AAN) – Sra. Joase Ann van der Biest, di BAZ-RRR Art Gallery, tambe a hiba palabra den e conferencia di prensa yama pa Fundacion Hende Muher, y a cuminza pa felicita e fundacion y su directiva pa para fuerte y yuda e clientenan cu mester, y traha pa concientiza comunidad tocante e tema delicado di violencia domestico.
Sra. van der Biest a menciona cu saliendo di BAZ-RRR su cultura y su meta cu empoderacion di hende muher ta hopi importante, nan tin nan portanan habri pa actividadnan di sosten pa esaki.
For di Diamars 26 caba e personanan cu kier haci opcion of cu kier conoce mas di e artistanan cu a colabora cu e exposicion cu ta bay tin pa recauda fondo pa FHMD, pa nan desaroya proyectonan di 2020 padilanti, ta keda invita pa pasa na BAZ-RRR pa haci esaki.
Oficialmente, e exposicion ta dia 29 di November den BAZ-RRR Art Gallery mes. E idea di “silent auction” ta cu conhuntamente cu artistanan local, logra haci un coleccion bunita basa riba e tema di violencia domestico den color orange, pa crea concientizacion y cada obra di arte mara na e fundacion ta crea consenshi na largo plazo pa e tema aki.
Den cuadro di e “subasta den silencio” BAZ-RRR ta extende su horario di 10’or di mainta pa 8’or di anochi, unda cu e comunidad completo por pasa y bishita e subasta y pone nan bid, y na mesun momento cu lo por adkiri un di e piezanan di e coleccion di e Fundacion, y semper e lo recorda cu e pieza aki a sali for di Fundacion pa Hende Muher den Dificultad.
Cada persona cu a pone un oferta riba un pieza, lo wordo invita dilanti di un Notario y e mester ta presente dia 10 di December cu e 16 dianan di concientizacion ta clausura.
