Analisis
Trabou den gobierno ta mara na un promesa cu e pais
Awe, un Aruba ansioso pa recupera su futuro cu tabata practicamente perdi, atrobe ta den suspenso pasobra un grupo di sindicato ta sigui exigi loke e pais no tin.
Un pregunta grandi ta surgi ora tene na consideracion e situacion di tanto Arubiano, cu a wordo perhudica dor di silencio di e sindicatonan cu mester a grita ora Aruba tabata wordo condena na e situacion cu e ta aden actualmente.
Sindicatonan di gobierno miho cu cualkier otro persona, ta na haltura di loke a pasa cu Aruba cu a mira su interes sink bou un maneho cu mucha lo rechasa.
Ora for di 2010 tabata bisto, cu paso tras paso e caminda pa futuro di Aruba tabata wordo destrui, sindicatonan mester a guia trahadonan cu ta paga nan contribucion, riba e caminda corecto.
Sindicatonan tabata na haltura cu si baha entrada di gobierno manera a pasa na 2010, lo no tin entrada suficiente pa paga nan miembronan.
Pakico nan no a actua na 2014 ora mester a enfrenta Hulanda y splica pueblo di Aruba con serio e situacion di Aruba tabata?
Hopi tempo pasa mester a stop e aventura cu Aruba tabata aden cu proyectonan peligroso, cu e fantasia di Citgo, cu a paralisa accion positivo di Aruba.
Sindicatonan tin tur cifra den nan man, manera cu prueba DIARIO a demostra. Lidernan sindical tabata tin den nan man informacionnan cu tabata mustra kico tabata pasa cu Aruba.
Awor kico sindicatonan ta busca? Pa Aruba subi su gastonan y asina porta habri pa Hulanda bin tuma medida pa Aruba?
Kico e beneficio sindical lo ta? Kico sindicatonan kier realmente?
Sindicatonan kier pa gobierno stop di hinca placa den AZV? Sindicatonan kier mas belasting pa empresanan pa nan cera nan porta y manda tur trahado cas?
Kico ta e obhetivo di lidernan sindical? Den ki direccion nan kier hiba nan miembronan cu ta depende di e informacion cu nan entrega?
Awe Aruba ta hisa cara y mira e lidernan sindical cu ta un menasa pa nos trankilidad.
Accion mester culmina. Accion contra gobierno. Accion contra e pueblo cu mester pone mas placa di belasting riba mesa, aunke e no tin forsa mas.
Accion cu lo manda mas trahado di gobierno cas. Sindicatonan ta na haltura.
Sindicatonan a pone Aruba lomba contra muraya. Sindicatonan di trahadonan cu tin un promesa sagrado cu Aruba, cu nan mester sirbi riba tur otro interes.
Trabou den gobierno ta wordo paga dor di un comunidad pa carga e pais aki den un direccion di bienestar, di e libertad cu e Arubiano a haci su lucha.
Den silencio Aruba ta observa sindicatonan. Nos muchanan. Nos pobernan. Arubianonan cu no tabata tin suerte di ta den aparato gubernamental, cu no ta consisti solamente di sostenedonan sindical.
Pero con un trahado den gobierno cu no ta sostene sindicatonan por expresa su mes? Con un trahado Arubano cu no a comprende e silencio di ayera ora otro tabata na mando, awe ta wordo obliga na forsa su pais?
Tempo tin tur contesta. Tempo cu a revela kico a pasa Aruba y lo expone tur berdad cu ainda por ta scondi.
