Trahadonan ta wordo uza pa un paso falso contra e pais
*Hulanda no por acepta destruccion di e base economico
*Aumento pago lo bira mas belasting cu lo suta Aruba na 2020
ORANJESTAD(AAN)–Aruba ta enfrenta un situacion sumamente serio na momento cu sindicalistanan di trahadonan den gobierno, ta uza e actual situacion economico y financiero di Aruba, pa crea un caos pa e pais.
Cifranan, leynan y plannan concreto pa saca Aruba for di un abismo financiero, ta indica cu Aruba no tin espacio pa paga pa mas gasto di personal. Esaki ta bisto tambe den e medidanan cu mester tuma pa hasta baha e cantidad di personal di gobierno.
Tur informacion cu DIARIO a acumula, ta mustra cu trahadonan ta wordo uza dor di sindicalistanan, cu ta bon na haltura di loke ta pasa Aruba y na e momento aki ta forsa trahadonan cu informacion incorecto pa dal un paso contra e pais.
Informacionnan concreto cu DIARIO tin na su disposicion ta mustra cu Aruba na e momentonan aki ta dilanti su ultimo oportunidad pa yega na un recuperacion economico y financiero.
Tur informacion cu DIARIO a logra acumula ta mustra con no awor, pero for di 2010 sindicatonan tabata na haltura cu Aruba tabata den problema serio si nan a analisa cifranan y rapportnan di e pais.
Sindicalistanan ta na haltura cu Hulanda no ta exigi nada di Aruba, cu no ta un gobernacion serio pa evita cu Aruba ta destrui su mes riba tereno financiero cu tur resultado cu esaki tin pa e pais.
Loke e sindicalistanan di gobierno ta busca pa e trahadonan di gobierno, ta bay hasta contra interes di e trahadonan mes.
Aruba no tin espacio pa cubri ningun gasto extra, segun tur investigacion cu DIARIO y cu DIARIO a publica na forma amplio pa mustra pueblo di Aruba cu for di 2010, Aruba ta den awa bruto di problema financiero.
“E sindicato ta na haltura cu ya gobierno mester manda trahadonan cas pa asina baha e gastonan cu gobierno tin cu salarionan di trahadonan. No ta normal cu e sindicatonan mes ta yuda provoca un situacion cu pueblo di Aruba lo no por paga,” informantenan ta indica.
Hopi preocupacion tabata tin na Aruba ayera mientras awe ta acerca. Si sindicatonan di gobierno forsa un aumento di gasto, e resultado pa belasting lo bira desastroso.
Comercio di Aruba y turismo lo wordo perhudica cu medidanan cu Aruba mester tuma cu sigur ta inclui e aumento di belasting, cu resultado pa tur hende.
Despues cu Aruba a hubila siman pasa ora Aruba mes a haya oportunidad pa soluciona su situacion financiero, awe ta habri Aruba cu un preocupacion grandi.
Subi entrada di trahadonan y adapta nan pago na costo di bida cu a aumenta, lo encera cu mester aumenta belasting, cu lo haci cu costo di bida ta bolbe subi na 2020, loke lo haci cu sindicatonan di Gobierno lo bolbe exigi mas placa pasobra costo di bida a subi.
Preocupacion grandi ta reina na Aruba pa accion sindical cu lo afecta e pais na forma serio.
