Sindicatonan ta haya propuesta di Gobierno un insulto na e ambtenaar

    327
    0
    SHARE
    - Advertisement -

    Awe den Conseho di Minister ta spera un propuesta nobo

    ORANJESTAD (AAN):  Sindicatonan ta continua nan lucha pa haya Indexering y pa e motibo ey diahuebs nan a yama un conferencia di prensa despues di algun dia di ta deliberando internamente, pero tambe tabata tin algun reunion cu Gobierno.

    Diahuebs mainta nan a convoca e rueda di prensa pa duna un ‘update’ pa loke ta trata e tema di indexering.

    Eduard Maduro, vocero di e sindicatonan, a indica cu dia 18 di October nan a bin haya e prome propuesta di gobierno despues di casi 8 luna.

    Gobierno a bin ofrece un aumento ariba e premienan cu ta wordo paga anualmente, desde e protocol di 2014. Ta trata di un aumento di 303 florin cu lo drenta na vigor na aña 2025.

    E sindicatonan a manda un carta na gobierno indicando cu e propuesta aki nan no ta acept’e y a neng’e categoricamente. Despues di tanto luna cu nan ta bin ta reuniendo locual a haya nan ta consider’e un insulto na e ambtenaar.

    No obstante, Maduro a sigui bisa, nan tabata tin algun reunion di sindicatonan y dia 5 di November nan a reuni cu Gobierno y e sindicatonan a bin cu un contra propuesta pa locual ta nan standpunt di 3.6% di indexering.

    Den e contra propuesta aki a informa gobierno cu “apesar di tur cos, apesar di no tabata ser trata na un manera mas diligente pa locual ta trata e tempo cu ta bin perdiendo pa locual ta e discusionnan di indexering, nos a dicidi di duna un ‘tegenvoorstel’ na gobierno unda cu nos ta bisa gobierno cu nos ta desvia y nos ta wiling pa desvia di e 3.6%”.

    E sindicatonan a bisa gobierno cu nan ta dispuesto pa gobierno duna un compensacion of un ahustacion di 2.4% den salario cuminzando 1 di Januari 2019 manera cu ta firma den protocol 2014.

    E restante di 1.2%, nan a bisa gobierno cu esaki lo bira tarea di e comision cu mester wordo institui ainda pa medio di un MB. E diferencia aki nan no ta bay lague bay perdi sin mas. Esey lo bira tarea di e comision pa asina wak di ki manera lo bay compensa esaki, Eduard Maduro a remarca.

    E propuesta di gobierno a desvia di e propuesta di 3.6% den salario pasobra nan kier a duna un aumento di solamente 0.6% y kier a hink’e den e premies y no den salario manera e sindicatonan tabata pidi.

    A bisa gobierno cu kier a haya un contesta diamars cu a pasa, pero Gobierno no a duna un contesta fiho pero si a pidi atrobe mas tempo y pa duna nan un espacio di un siman mas pa dia 19 di November duna un contesta ariba esaki.

    E sindicatonan a reuni y a dicidi cu nan no por keda duna tempo pasobra ya caba a pasa 8 luna. Diaranzon a informa gobierno den un carta cu e sindicatonan no ta bay warda te otro siman dia 19.

    A duna Gobierno un biaha mas 24 ora, te cu diaranzon atardi pa por a reacciona ariba nan carta. Diaranzon a drenta un reaccion di gobierno unda ta bisa cu ta haciendo e calculonan pa por bin cu un propuesta nobo.

    Gobierno a indica cu na lugar di dia 19 di November nan ta bay yama e sindicatonan pa un reunion pa asina presenta e posibel propuesta den Conseho di Minister awe diabierna mainta.

    Mientrastanto, ya caba ta den liberacionnan pa asina yama e 5 sindicatonan pa un reunion extraordinario pa asina informa e miembronan di tur locual ta tumando lugar. Otro siman lo ta yamando e reunion aki pa asina conhuntamente tuma un decision, Maduro a señala.

    - Advertisement -

    DUNA COMENTARIO

    Please enter your comment!
    Please enter your name here