Pa tuma lugar dia 28 di November:
ORANJESTAD (AAN)— Genely Quandt, boluntario di Stichting Rancho pa medio di e Centro di Actividad Rancho, a elabora tocante e prome “marché” (mercado) cu e fundacion ta bay organiza, dia 28 di November den e bario di Rancho mes.
Esaki lo tuma lugar den e Rancho Plaza ubica entre John Emanstraat y Vistraat, y cu den boca di pueblo ta conoci como “Plenchi Coco”.
Genely a splica cu e mercado aki ta e inicio di un proyecto cu nan kier cuminza na 2020, unda no solamente nan bay ofrece e mercado pa e habitantenan di Rancho, pero pa Aruba en general, sino cu nan kier crea eventonan educativo pa e habitantenan di e bario. E meta ta pa crea tayernan di trabao unda nan por siña con pa traha arte, articulonan di klei, artesania, etc., cu nan por ofrece den e mercado cu nan kier hacie otro aña, tur luna, y pesey ta organiza e mercado di dia 28 di e luna en curso, pa nan haya fondo.
Genely a duna di conoce cu e Stichting a haci un peticion caba na CedeAruba, cu lo por traha hunto riba e aspecto social pa crea proyectonan, con ta bay educa e habitantenan pa yega na organiza e mercado y zorg pa nan tin nan productonan bon prepara, pa nan tin e conocemento pa por funciona den un mercado. Tambe pa e parti di logistica nan mester haya e fondonan pa keda hacie den futuro.
Quandt a splica tambe cu organizacion di un mercado tin henter un costo di operacion cune, cu como fundacion nan ta cuminza cune, pero nan mester di sponsors tambe pa yuda nan realiza esaki mas tanto posible den futuro, y garantiza cu otro aña cada fin di luna, lo tin un mercado den Rancho, pa e comunidad di Aruba.
Genely Quandt a haci un peticion na comunidad, cu cualkier persona cu kier bende su producto, of cu kier sponsor e proyecto aki pa tuma contacto cu Stichting Rancho, pa colabora y haci e proyecto aki uno exitoso, cu den futuro comunidad di Aruba por keda disfruta di dje.
