Te awor tin un average di 110 registracion di rancho:
ORANJESTAD (AAN) – Tocante e registracion di ranchonan cu tin na Aruba, esaki ta bayendo bon, segun Ing. Haime Croes, director di DIP.
Den un entrevista cu DIARIO, el a declara cu e prome dia cu tabata tin registracion 90 persona a asisti y den e siman aki a subi cu 20 inscripcion.
E director di DIP a menciona cu e personanan cu a acudi na e yamada a bay cu e formulario, y e ta spera cu den e simannan cu ta bin, ya cu nan tin dos luna pa regla esaki, nan por entrega tur loke DIP ta pidi nan.
Sr. Haime Croes a indica cu e personanan concerni a haci hopi pregunta y el a subraya cu pa DIP, importante ta e registracion ya cu nan ta hayando diferente critica y remarca di diferente instancia, pa loke ta trata seguridad di Aruba.
El a bolbe splica cu e registracion di e ranchonan ta pa nan sa ken ta e doñonan pa nan por responsabiliza e hendenan. El a subraya cu ultimo tempo e situacion di Venezuela ta poniendo hopi presion riba nos Isla, ya cu tin hopi hende indocumenta y DIP ta haya señalnan di comunidad y instancianan cu tin varios di nan bibando den e ranchonan.
Tambe tin hende local cu ta biba den e ranchonan y esey tampoco ta e idea, y ademas diferente problema contra moralidad ta sosode eynan.
Tur esaki ta haci cu mester tuma decisionnan pa tin tur cos bao control y ta bon pa e personanan cu tin rancho registra pa nan sa kico nan tin.
DIP tambe kier tin un bista amplio tocante ken ta doño di ranchonan, na unda nan ta, pa tin responsabilidad. Tambe pa cumpli cu e pago di 5 florin pa meter cuadra manera e ley ta bisa. DIP no ta bay acepta mas expansion ni pa mas rancho bin acerca y tur loke tin aworaki nan kier registra, sr. Croes a reitera cu enfasis.
Ademas e meta ta pa e ranchonan ta sostenible cu e medio ambiente, por ehemplo pa no tin asbesto den e dak. Pero tur e informacion aki e personanan ta ricibi ora di busca e formulario.
