Home General Tamara Beaujon indicando cu e cROPV ta perhudike y su famia completamente

Tamara Beaujon indicando cu e cROPV ta perhudike y su famia completamente

438
0
SHARE
- Advertisement -

ORANJESTAD (AAN): Riba Diahuebs, e ciudadano Tamara Beaujon a entrega un zienswijze riba cROPV, mirando cu esaki ta perhudike y su famia completamente. Y no solamente e cROPV, pero henter e maneho di DIP y su precursor cu durante decadanan a haci mal uzo di nan poder pa medio di nan maneho cu terenonan priva.

“Nos storia ta cuminsa cu e compra di e tereno di Wariruri, conoci den registro como 1-M-11 (e baai di Wariruri), na 1966 door di mi tata Julius Richard Lope Beaujon. E la cumpre e tempo ey cu e intencion di traha un paar di bungalows pa uzo den weekend y vakantie. el a te hasta laga pone un tanki di awa fresco pa ora pasa dia eynan.”

E recuerdonan di e paisahe di e tereno tempo mi tabata mucha ta completamente diferente cu loke tur hende conoce awe. E unico dos cosnan cu a keda casi mescos ta e natural bridge chikito conoci como “baby natural bridge” y e barancanan den e rooi.

Di resto tur pero tur cos cu tabata haci’e un di e paisahenan mas bunita y unico di Aruba su naturalesa a worde completamente masacra door di decadas di mal maneho di DIP y su precursor.

Un tereno cu tabata tin un cero immenso di santo blanco (duin) yen di cocorobana y yuco. Un cero asina grandi cu no por a ni wak e beach of lama awe no tin ni un rastro di esaki mas. Con esaki a pasa?

Pa decadas esnan encarga cu e departamento di infrastructura a duna permiso (vergunning y despues toezegging) na Jan, Piet en Klaas pa coba santo na nan Amen.

Despues na nomber di turismo atrobe Jan, Piet en Klaas tabata haya permiso pa drenta tereno priva y destrui esaki, loke a keda di cobamento, cu ATVs y UTVs como tambe cabay. Cuanto a worde cobra na turista pa haci uso di tereno priva…nan so sa! Pero nos nunca a mira un cen preto di esaki y pa colmo e situacion nos nunca por a haci nada cu e tereno pa genera placa.

Cosnan a bay asina leu cu un dado momento mi tata a laga cera e caminda cu ta pasa den e tereno pero a caba ta habri esaki back riba peticion di grenspolitie den nomber di “algemeen belang.”

Na 2004 mi tata a fayece y nos a bay over na bende e tereno un accion cu a bay caba te na Hoger Beroep pasobra cu cada bes nos haya benta esaki tabata cay for di otro despues cu cliente bishita DIP.

Awor cu introduccion di e ROP y cROPV nos a bin ripara cu nos tereno awor ta bay cay bao di zona berde, o sea, Landschap y absolutamente nada pero nada por worde haci riba dje, pero SI companianan priva cu ta bende tours rond di nos isla por sigui genera placa riba nos custia. Mas aleu, nos turismo por sigui bende Aruba propagandando nos tereno riba website pa atrae turista pa Aruba… y nos net pero net nada, zero, nul.

Mirando tur esaki, awe dia 28 di November mi a entrega un zienswijze di 8 pagina riba e cROPV protestando enfaticamente cROPV. Mi no tin nada contra ROP, etc. pero e no por ta asina tampoco cu esnan cu tin terenonan den cierto zonanan di e ROP, cROPV ta worde perhudica di tal forma.

Mirando tur esaki y siguiendo conseho di e abogado cu a yuda nos den henter e trayectoria aki ta anuncia cu entrante 2 di december 2019 ta cuminsa cu preparacionan pa ontzeg entrada na TUR HENDE riba e tereno di Wariruri, su beach y e laman dilanti dje.

Tambe ta preparando cartanan pa bay AHATA y ATA pa stop di propaganda Wariruri como tambe stop benta di tours cu ta menciona of para na Wariruri. Ami personalmente lo bay OM pa haci denuncia di hechonan castigabel den e storia di Wariruri.

Mas ainda, ta pidi tur esnan cu tin tereno priva y ta sinta den e mesun boto pa por favor traha bo zienswijze y entregue ainda pa mañan dia 29 di november 2019, no mas tarda pasobra e ultimo fecha oficial pa entrega ta dia 1 di december 2019 cu ta diadomingo awor (y nos tur sa cu e oficina di DIP lo no ta habri).

Esaki pasobra ta considerando un caso colectivo den corte pa daño pa tur esnan perhudica door di Gobierno di Aruba y su maneho pa cu tereno eigendom y violacionan di derechonan economico entre otro door di cobamento ilegal di santo of uso no autorisa pa turismo etc.

Den e proximo simanan lo anuncia con tur esnan perhudica lo por contact mi persona pa asina registra cada un di boso storia pa wak con ta sigui cana e caminda.

 

- Advertisement -

DUNA COMENTARIO

Please enter your comment!
Please enter your name here