Ministerio Publico mester ta destino final investigacion
*Conspiracion contra bida humano ta delito Laboratorio
*Hospital Nobo ya ta parti di documento den man Husticia
ORANJESTAD(AAN)–“Bida di mas cu Dos Mil pashent a wordo poni na riesgo serio den Laboratorio di Hospital Nobo. E caso aki no por termina cu un simpel rapport, pero mester wordo atendi dor di Ministerio Publico. Si informacion te awor ta corecto, aki ta trata di un caso di conspiracion criminal.”
E prome informacionnan na Juni a hinca Aruba den shock. Awor confirmacion pa medio di cambionan cu a wordo introduci den laboratorio di Aruba, a duna e pais mas motibo pa exigi husticia a base di e resultadonan di e investigacion cu ta tuma luga.
“Aki ta trata di un caso contra leynan penal,” a wordo mustra na DIARIO. No tin diferente entre duna hende veneno bebe cu loke a pasa.
Personanan cu a wordo paga pa yuda ciudadanonan lucha pa nan salud, a acusa di nan trabou y a haci cu bida di personanan cu a realisa e test ta na peliger.
Banda di esaki tin algo mucho mas cruel. A manipula cu informacion medico na momento cu a cobra mas pa cu normal ta paga pa haci e test.
Hopi ciudadano ta di opinion cu a bira tempo pa nan tende kico a pasa cu Hospital den cual a hinca sumanan enorme pa awor Pueblo tin mas miedo di busca nan salud cu nunca tabata e caso.
“A construi e hospital nobo pasobra e bieu lo no tabata bon. Awor ta resulta cu ta un problema tras di otro. No a tende nada mas di e boiler peligroso, cu nunca mester tabata den e edificio,” a wordo splica.
E introduccion di un fundacion pa atende laboratorio tabata pa motibo cu den pasado a registra un caso di fraude. Esaki ta nifica cu mester tabata mucho mas cuidadoso cu loke tabata pasa den laboratorio.
Informacionnan for di juli a indica cu personal no tabata tin confiansa den e gerente cu ta suspendi y lo ta un sospechoso den e caso cruel. Informacionnan ta mustra cu e tin abogado prepara pa defende su persona.
Informantenan ta insisti pa e caso aki bira parti di investigacion penal di Ministerio Publico cu ya mester ta atende e proyecto di Hospital Nobo cu a guli sumanan enorme di pueblo di Aruba sin resultado cu pueblo por a spera.
“Esaki tabata un atentado directo contra bida. Si hende a muri mester papia di culpabilidad di morto den casonan di sospechosonan,” informantenan a confirma a base di nan prome informacion na DIARIO ora e investigacion a cuminsa.
