Home General Tin varios lugar na Aruba cu a bira victima di Ransomware pero...

Tin varios lugar na Aruba cu a bira victima di Ransomware pero nunca nan no a paga hackers

64
0
SHARE
- Advertisement -

ORANJESTAD (AAN): “Ransomware” ta un tipo di malware di computer cu hopi biaha ta plama via un mensahe di email cu ta mustra di ta normal y cu ta contene un attachment na dje.  Cualkier hende cu ta riba e network na trabao cu bay habri e email ey, ta infecta full su sistema.

Ransomware a cuminza circula den mundo di computer for di 1989 caba.  E ta infecta hopi biaha e computer server principal, y ultimo tempo ta djis blokea acceso pa tur bo filenan di mas importante, y ta exigi pago pa asina bo haya un ‘yabi’ pa habri e filenan aki bek.

Esey ta loke a pasa Dialuna madruga cu henter e network di Hospital di Aruba.  Tur files importante, imagennan di video di endoscopie, imagen di X-Ray, echo, MRI, y informacion di pacientnan, ta “scrambled” y ta cera.  Pesey Hospital a pasa casi henter e siman aki cu sistema down, dolor di cabez cu cita, y hasta hopi operacion a wordo cancela.

DIARIO a bin haya sa for di algun fuentenan di mundo di IT, cu na Aruba ya pa basta tempo tin diferente compania cu a bira victima di Ransomware.  Negoshinan grandi na Aruba a haya nan computer full blokea, cu nan no por haci nada, y ningun sucursal por traha.

E persona cu a manda e Ransomware, ta exigi miles di Dollar como pago via Bitcoin, pa asina e manda e “encription key”, un yabi electronico cu lo habri bek tur dato riba e computer.

Sorprendentemente, varios di e negoshinan na Aruba NO a baha cabez pa e hackernan aki.  Nan no a manda ningun pago, a ni contesta e hacker.

Como cu e compania ta backup nan computernan asina regularmente, e compania a djis prefera di instala tur e sistema bek di nobo, y ‘restaura’ tur file di computer bek.

Pesey ta importante pa tur compania, y hasta ciudadanonan cu tin computer, tin un bon software legal cu ta actua como anti-virus y tambe firewall, y lo principal ta pa bo haci backup constante riba un external disco, pa asina bo por restaura tur cos bek, sin cu bo mester baha cabez pa e miles y miles di Dollar cu nan ta exigi pa bo paga.

Varios compania na Aruba a bira victima, y nan por bati riba nan pecho cu nan a lanta nan IT bek completamente sin paga ni 1¢ preto na hackernan.

- Advertisement -

DUNA COMENTARIO

Please enter your comment!
Please enter your name here